Aizawl; Mizoram sorkar chuan RKVY programme hnuaiah Thingsulthliahah 'Vawk Farm' a din dawn a, hi farm dinna tur hmun hi nimin khan Home Minister R Lalzirliana leh AH&Vety Minister, C Ngunlianchunga ten an tlawh a. AH&Vety Director, Dr. LB Sailo leh a thawhpuiten an tawiawm. Vawk Farm-ah hian vawkpui 200 dah theihna tur ‘Establishment of 200 Sow Unit’ chu Rashtriya Krishi Vigyan Yojana (RKVY) sum hmanga sak tur a ni a, Farm sak hna hi hun reilote-ah tan tum a ni. Kum hnih chhung chuan zawh tum a nih thu AH&Vety Deptt. hotute chuan an sawi. Mizorama vawk note indaih lohna a nasat avangin ram pawn atangin vawk leh vawk note lak luh reng a ni a, heng ran lakluh atangte hian vawk natna hri lengin Mizorama vawk awmsa pawh a suat nasa hle a, he indaih lohna phuruk nan te, ramin vawk chi tha leh hrisel a neih theih nan te leh NLUP tih changtlun nan he Vawk Farm hi din tum a nih thu, AH & Vety Department hotute chuan an sawi bawk. He Farm hian Mizorama vawk note mamawh za zelah 30 vel chu phuhruk thei beisei a ni a, kumtin vawk note 4,800 vel a thar chhuak thei dawn a ni. Farm atan hian vawk chi tha, ram pawn atanga lak tum a ni a, he project hi cheng nuai 470 senga din tur a ni ang.