H. Lalrindika

Thingtlang lo neituten an thlai thar tam tak a thlawn liau liaua Aizawl khawpui an rawn pe thin hi a ropui ngawt mai.

Heti zat thlai thar an lakna, an thlawhhma kawng hi a nuamin a rualrem vek lo ang, fur ruahsur hnuaiah chetsual theihna kawng nal zawha vangvat kai chunga thlan tui far zawih zawiha an thawh chhuah sa, Aizawl mipuiten a thlawn liau liaua kan lo dawng thin hi a va lawmawm em!

Hetianga mahni hek zawk leh hah pawh pawisa loa khawpui mite thil pek duhna thinlung hi, “Mizo rilru fir, duhamna leh hlemhletnain a pawlh dal loh rilru thianghlim atang lo chuan khawi atang mahin a lo chhuak lo tawp ang,” tih kan ring. 

Thingtlang lo neitute hian Aizawl khawpui lakah hian bat in nei reng reng lo chunga in thlai thar tam tak, thlan sa phulkaia in thawh chhuah sa a thlawn liau liaua inrawn pek thin avang hian, lawm avangin Aizawl khawpui lung hi a chhe hial thei asin. 

In lo kalna ngal tha hah man lah chu inla duh mang si lo, in iptepuia khung luih ngawng ngawng pawha, “Kan unaute hnena mahni thlai thar kan peka kan thartemin engmah kan beiseiin kan la ngai lo,” tia tlawmngai taka in la duh lo thinte hi in va zahawm tehlul em! Hei hi a ni Lal Isua min zirtir kan zawmna chu, kan unau tlachhamte hnena, “Lum tak leh puar takin awm rawh u,” ti ringawt lova an mamawh kan pek avang leh a let leh beisei lova thil kan pek thin hi. Thingtlang nun thianghlim vul zel rawh se.

Aizawl khawpui miten hetiang chawhmeh zozai lakkhawmna a in tha sen nasat tur zia leh in hah turzia an ngaihtuah a, lo lam thlai mai ni lo, tumbu, hruizik, ankhapui, rawtuai, chakawk leh a dang tam takte hi furpui khawchhe hnuaiah engtin nge in lakkhawm theih zawk kan ti, thosi, vangvat leh mi seh thei rannung tam tak karah luikawr leh ramhnuai khawkrawkah vawi tam tak intawlh thlukpui ngeiin kan ring, thlan tui leh ruah tuiin a nan zawr vek tur che u kan ngaihtuah hian, Aizawl khawpui hian in lakah lawmthu sawi lo thei lo kan nih  vanga lawmthu sawina thilpek nena kan rawn umzui lawm lawm che u a, in motor-a an rawn vawm luh luih tak emah chuan, “A ni tak alawm maw le,” tia tlawmngaihna rilru nena in han hawn duh hram tate hian thingtlang nun ropuina leh zahawmna a tilang zual a, Mizote inunauna la thatzia a tichiang lehzual bawk a, a va tha tehlul em! In rilru depde lohzia  leh phut let in neih lohzia tichiangtu a ni e.  

Thlai thar in rawn pek hian khawpui mite rilru thianghlim a kai tho thar leh tih inhriat loh kan duh lo e, thlai thar in rawn pe dawn tih an hriat rualin a dawngtu turten phur takin lo dawnsawn dan tur leh a lo do let dan tur an rel mam mam thin a, a thenin a semna tur motor an thawh theih tur thu an sawi a, mi pakhat lawm lutuk phei chuan, “Thingtlang mite hi an fel em mai, vanram kai vek rawh se,” a ti chhuak hial asin. Ngawiteh u, hei hi sawi hmaih ka va hlau em, in chawhmeh rawn pek an dawn ruala a semtute kutah, “Thingtlang lo neih hahthlakzia kan hria a, heite hian lawmthu kan sawi ve ang e,” tih paha pawisa an hum lettir laite hi han hmu ve ula kan va ti em! Thlai thar petute u, Zonun mawi kha in rawn kai tho a, intinung thar leh mek asin. 

Hawh teh u, i ngaihtuah tlang teh ang u.
    Aizawl khawpui mite kawtkaia an thlai thar min rawn pek kan dawn rual hian  a dawngtute hian kan remchan ang ang keng khawm ve tawh thin ila, a va tha dawn em! Mi thenkhat chuan an ti mek tawh bawk e.
    Thingtlang lam mipuite u, hripui lakah Pathianin lo veng him zel che u sela, in kut hnathawh malsawmin awm zel rawh se.