Tangkhang thiartu zingah bus conductor in hripui a kai tih hriatchhuah a nih avangin Mizoram State Transport Department bus khalhtu leh conductor te chu covid 19 test neih nawn tir an ni a. Lo haw runpui a zawh hnuah kar 2 a liam tawh a, Aizawl City Bus Owners Association te chuan hmun then khatah an naute’n thinhrik an hlawh nia hriain fimkhur thil thuah an driver leh conductor te chu Covid-19 test an neih tir leh bawk a. Sawrkar driver te hi test result chhuakin fihlima ngaih an ni a, hetih lai hian city bus lam chuan an result an nghak mek a ni.

Sawrkar bus in a daih loh avangin city bus chu tlan tur a man an ni a, ACBOA leh DC, Aizawl te chuan tangkhang te thiar dan tur duangin an thiam tawkin ro an rel a, bus driver leh a conductor te chu vawi khat thiara khunghran zel tur chuan bus leh mihringin a daih dawn loh avangin quarantine hman an ni dawn loa, hemi hnuah pawh khunghranna hmunin a tlin loh avangin an chenna in lamah in khunghrang tura tih nia sawi a ni bawk a ni. Hetih lai hian zu lo rui awm te chu ACBOA hian a thunun zel zawk bawk a ni. Kan thil neih leh phak tawkin tangkhang lo haw te hi thiar an ni a, kan ram hian hei aia ruahmanna tha a nei thei lo tih pawm mai a tha awm e.

Sawrkar an ni emaw mimal (private) an ni emaw bus driver leh conductor te hian hripui kai huamin tlawmngaih an chhuah a, tlan an chak zawk zawk hi a rinawm lem loh. Hetih lai hian conductor in covid 19 a kai tih hriat a nih khan nasa takin a selna a darh a, demna lam pawh a chhuak nuala a pawi hle a, tlawmngaih chhuahtute rilru nain kan siam mai ang tih pawh a hlauhawm e. Thu bul bal kan hriat loh vang pawh a ni mahna.

City bus khalhtute zingah hian hripui kai an awm palh a nih chuan khawtlang (community) ah a darh hlauhna lian tak a awm a, a awm viau e. Result hi lo chhuak phawt sela a kai an awm palh a nih pawhin an duh vanga kai an ni lo tih hriatpuiin an tihtur an hlenchhuak zawk a ni tih hriatpuia, lainatna nena in dawm thiam a tul khawp ang. Mipuiin a invenna an hre vek tawh a, chumi chu zawm mai tur a ni a. Hetih lai hian hripui do kawngah mahni mawh theuh hlen chhuak ila hmalam a sawn theih ang. ‘Hripui do kan ni a, a kaia te do kan ni lo’ tih kan hriat fo tawh kha.