ZALEN Aug. 14, 202; 'Ride to clean air’ tih thupui neia Thirsakawr-a India ram fang mektu, Vanlallawmzuala Varte (LZa) s/o VL Chhuanawma, Mission Veng chu km. 14,208 vel inkhalh tawhin, Bihar, Patna a thleng tawh a, state 4 chiah tlan hmabak a nei tawh.

Tarlan tawh thin angin, LZa hian January 25, 2024 khan Aizawl a chhuahsan a, nimin thleng khan km. 14,208 vel a tlan tawh.

'Right to clean air' thupui nei a inkhalh a nih angin, a thlen chin state/capital hrang hrangah Pollution Control Board te nen inkawmna an nei thin a, boruak thianghlim awm theihna tur leh a pawimawhna te an sawiho thin. A thlen chin a piangah Pollution Control Board lamin an lo hlut hle zel a, Bihar-ah phei chian an Governor nen inkawmna an nei hial a ni.

Chawhrualin Lza hi nitin km 100.39 tlan ziah ang a ni a, ni 21.2.2024 khan km 158.49 a tlan a, hei hi ni khata a tlan thui ber a la ni.

Lza hian tunhnai khan khawvela lirtheiin a zawh theih hmun sang ber Umling La a inkhalh thleng tawh bawk a. Thirsakawr-a Lza inkhalh ang thleng phak hi Mizo zingah midang an la awm hriat a ni lo a, Thirsakawr ngata Umling La thleng pawh hi Mizo dang an awm hriat a ni lo bawk.

Tunah hian Sikkim, Arunachal Pradesh, Nagaland leh Manipur chiah hmabak a nei tawh a, a tum a hlenchhuah ngei theihna turin Mizo mipuite tawngtaipuina a ngen.