Aizawl: Mihring hrisel pangngai zingah mi dangte tana thisen pe ve ngailo te aiin pe thin te chu an damrei zawk niin Doctor thiam ten an sawi. Zirtawpni khan Association for Voluntary Blood Donation in MJA Member te puala thisen pek chungchang zirhona Aizawl Press Club a neihah he thu hi sawiin Doctor thiamte chuan mi hrisel pangngai, kum 18 - 65 inkar chin, thisen 12.5 gm% chin tan thisen pek a hlauhawm loh tih an sawi a. Thisen pek hian kan taksaa thau leh thil tha lo awmte paihchhuakin thisen tharlam a insiam zel tih an sawi bawk. Tlawmngaia thisen pek (voluntary) chu rulhleh ngai (replacement) a pek aiin a dawngtu tan a thianghlim zawk nia sawiin voluntary-ah chuan uluk takin thisen petu chanchin hriat theih a nih bakah duhthusam lo a awm chuan hnawl a ni a, replacement-ah chuan hmanhmawh taka thiltih a ngaih thin avangin eng emaw a thleng palh thei tih sawiin, “Replacement atang hian natna kai an tam zawk a ni,” tiin voluntary-a thisen pek uar turin thalaite an sawm bawk. Dr. K.Rothangpuia chuan Aizawl Civil Hospital Blood Bank-ah a mamawh tan Platelets bakah thisen concentrate an siam thei tawh niin a sawi.