Aizawl : Mizoram State AIDS Control Society (MSACS) leh Association for Voluntary Blood Donation (AVBD) huaihawtin National Voluntary Blood Donation Day hman a ni. MSACS project director Dr Lalthlengliani chuan Thisen pek a hlu a, thisen pe thei nih a hlu a, nunphungah invawn a tul, tih a sawi.

October 3, 2022 (Thawhtanni)-a Chanmari YMA Hall, Aizawl-a National Voluntary Blood Donation Day hmannaah hian MSACS project director Dr Lalthlengliani chuan, thisen pek a hlu tih sawiin, "Thisen pek a hlu a, thisen pe thei nih a hlu a, thisen pe thei tura tan lak a pawimawh a, kan nunphungah invawn a tul," a ti.

Dr Lalthlengliani chuan, sawrkar kum kal mekah Mizoram pumah thisen unit 15,244 pek a ni tawh tih sawiin, "Chu'ng zinga unit 14,176 chu a thlawna pek a ni a, voluntary donation percentage chu 93% a ni," a ti a; kum kal mekah blood donation camp tum 252 huaihawt a nih tawh thu leh chutah chuan thisen unit 10,012 pek a nih tawh thu a sawi.

HIV/AIDS chungchang sawiin MSACS Project Director chuan, "HIV-ah Mizoram dinhmun a tha lo. HIV hrik darh danah Mizoram hi India ramah a sang filawr a, kai thar an la awm zel a, a la darh zel tihna a ni. HIV kai thar titlem sorkar laipuiin a ngai pawimawh a, chuta tan chuan mi tin kan pawimawh a ni," a ti.

NVBDD hmannaah hian Dr Sangzuala, assistant professor, ZMC-in thisen pe tura nunphung hrisel chungchang a sawi a, MSACS joint director (IEC) Lalzuiliani'n HIV laka inven nan mipat hmeichhiatna lama fimkhur a tul dante a sawi. MSACS-a epidemiologist Dr CLR Hluna'n HIV/AIDS chungchang a sawifiah a, C Lalbiakthanga, Dinthar Vengin ruihhlo tih loh a pawimawhzia a sawi bawk. MSACS assistant director (YA) Lalneihzeli kaihhruaiin quiz buatsaih a ni a, AVBD general secretary Lalrinkima'n lawmthu sawina hun hmangin hnu a khâr a ni.

National Voluntary Blood Donation Day hi October 1 a ni a, kuminah chuan Inrinni a nih avangin October 3, Thawhtanniah hman niin, thupui chu 'Donating blood is an act of solidarity. Join the effort and save lives' tih a ni. Vawiina NVBDD hmannaah hian Mizoram Institute of Comprehensive Education (MICE), Mount Carmel School leh Greenland Higher Secondary School zirlaite an tel a ni.