Aizawl: Aizawl Civil Hospital chuan January atanga July 2015 inkar chhung khan thisen unit 7403 an la a, heng zinga 64% hi mi tlawmngaite pek a ni. Aizawl Civil Hospital, Blood Bank thawktute hnen atanga Zalen thudawn danin thla 7 chhunga thisen pek unit 7403 zinga unit 4757 hi mi tlawmngaite pek a ni a, unit 2646 hi rulh leh (replacement) atana pek a ni thung. Blood Bank thawktute chuan thisen an lak unit 7403 atang hian unit 3832 (52%) chu private hospital hrang hrang hnenah an pechhuak leh tih an sawi a. Mi thenkhat ten thisen pek a tam hle chunga indaihlohna awm reng nia sawi thin chungchangah Blood Bank thawktute chuan, “Thisen kan lak zinga a tam zawk hi private hospital-ah kan pekchhuah leh a tul a, kan lak zawng zawng hi hmang vek thei ila chuan kan indaih deuh ang a. Mahse, a mamawhte hnenah pekchhuah ve reng a tul bawk si avangin indaih reng sen a ni lo a ni,” an ti a. Thisen chu stock nual mahse group mamawh bik leh duh bik a awm thin avangin an duh group a awmloh chuan harsatna an tawk thin tih an sawi bawk. Civil Hospital Blood Bank hian nitin chawhrualin thisen unit 60 vel an pechhuak thin a, thisen sawngbawlna atan hian unit 1 ah Rs. 1500 vel an hman laiin a buaipuina (processing fee) hi unit khatah Rs. 550 chauh an la thin a nia thudawn a ni.