Aizawl: Mizoram sawrkara Taxation department chuan kum kal mek, April - January (thla 10) chhungin chhiah chi hrang hrang Rs. 8,28,47,00,349 an hmu tling tawh a, chu chu 2022-23 a chhiah hmuh beisei zat (revised estimate) Rs. vbc. 900 atangin zaa 92.05 a tling. 

Taxation department tarlan danin, chhiah chi li, GST, profession tax, sales tax leh entertainment tax lak thin a ni a, kumin thla 10 chhungin, GST-ah Rs. 7,06,53,25,068, profession tax-ah Rs. 13,53,97,097, sales tax-ah Rs. 1,08,36,29,615, entertainment tax Rs. 1,16,876 leh chhiah dang atangin Rs. 2,31,693 an hmu tawh.

Kum 2022-23 chhunga sawrkarin target a tuk chu Rs. vbc. 730 a ni a, chu chu revised estimate-ah Rs. vbc. 900-ah tihsan niin, an khum ngei a beiseiawm a. Kum kal mek chhung a an hmuh tam ber thla January, 2023-ah Rs. vbc. 110.99 an hmu a ni.

Kum tin sawrkarin tax revenue lakkhawm zat tur a bituk thin a, kum 2021-22 chhung khan chhiah khawn tur a bituk zat chu Rs. vbc. 717.13 a ni a, an target chu Rs. vbc. 177.71 a khumin an chhiah khawn zawng zawng tling khawm Rs. 8,94,75,31,770 a ni.