Aizawl: Thla 10 kalta (April 2014 atanga January 2015 inkar) chhung khan Legal Metrology chuan dan diklo a zawrh gas leh a phai bur 1446 an man. Legal Metrology Department hotute hnen atanga thudawn danin gas hralh ruk (black) leh a phai (shortage) an man bur 1446 atang hian Rs. 1,42,000 chawitir an ni. Hei bakah hian Legal Metrology hian Petrol a black a zuar mi 19, bukna dik tawklo hmang Retailer 19, cement bag 3, thlai/sa zuar mi 17 leh dawrkai mi 3 an man bawk a, heng mite sum chawi tlingkhawm hi Rs. 52,800 a tling a ni. Hei bakah hian Legal Metrology Department hian petrol pump, weighbridge, tui meter leh thildang enfiah hna an thawk bawk a, heng atang hian Rs. 3,81,240 an hmu bawk a. Nikum April atanga kumin January thla tawp thlenga sawrkara an sum chhunluh chu Rs. 6,40,440 a tling tawh a ni. Legal Metrology Department a Joint Controller Thangtinliana Pachuau chuan Zalen zawhna chhangin nikum lamah sawrkarin target a tuk Rs. nuai 10 chu an tlin tih a sawi a. An department chu revenue thawkchhuak department an ni lo tih sawiin,"Consumer te humhim tura thawk kan ni a, a tulna avangin fee hi kan la ve chauh a, kan tan chuan hmuh tam a har thin hle a ni," a ti bawk.