Aizawl November 26, 2023 : Mizoram sawrkara Taxation department chuan kumin April - October (thla sarih) chhungin chhiah chi hrang hrang Rs. 6,71,11,29,777 an hmu tling tawh a, chu chu 2023-24 a chhiah hmuh beisei zat (target) Rs. Rs.Vbc. 1,084.29 atangin zaa 61.89% a ni. Chhiah chi li - GST, profession tax, sales tax leh entertainment tax lak thin a ni a, kumin thla sarih chhungin, GST-ah Rs. 5,73,34,84,346, profession tax-ah Rs. 9,15,01,707, sales tax-ah Rs. 88,20,12,294, entertainment tax atanga hmuh an la nei lo a, chhiah dang atangin Rs. 1,31,430 an hmu tawh. Covid leng vangin kum 2020-21 chhung khan mi mal leh sawrkarin harsatna hrang hrang an tawk a. Taxation department pawhin tax revenue a hmuh thin angte a hmu pha lo nasa hle a. April, 2020-a an chhiah hmuh chu Rs. Vbc. 14.35 chiah a tling. Hetiang dinhmuna an din avang hian kawng hrang hrangin tan an la a, tax return file lote reminder-te pein, a theih ang angin an tanpui a. Tax deduction at source (contract hna atanga tax chhun luh)-te pawh theih ang anga chhuia hma an lak hnuah Covid lengte a lo ziaawm ta bawk nen, tun dinhmunah chuan chhiah hmuh a tha chho leh tawh a, kum liam ta 2022-23 a chhiah hmuh zat chu Rs. Vbc. 1,020.66 a ni.