Mana Motors chuan Lungleia an tlangzarh hnuah Aizawlah Mahindra XUV 3XO an khuh hawng a, Dealer Principal Dr Franklin Lalrinngheta chuan thla khata lirthei 200 hralh tura bituk insiamin an lirthei khuh hawn thar nen beiseina an nei sang hle tih a sawi.

Indian company Mahindra & Mahindra chuan car an siam chhuah danah kalphung thar neiin SUV hriat hlawh tak, XUV 3OO chu XUV 3XO tia hming thlakin an car siam chhuah zel tur zinga tê ber a ni a, May 15 khan khawvel pum huapin a tlangzarh a, Mizoram dealer Mana Motors chuan May 18 khan Lungleia an showroom-ah an tlangzarh zui ve leh a ni.

Ningani khan Mizorama an hmunpui, Bawngkawnah Lallianmawia, IPS Rtd-in khuh hawng lehin Mahindra motor thar chu tun hma aia chuan nuam zawk, changkang, chak leh passenger te tan a him zawk a nih thu a sawi a, Mana Motors-in mipuite tana lei theih tura a khuh hawng ta chu lawmawm a tih thu a sawi.

He hunah hian Dealer Principal Dr. Marina chuan September, 2013 atangin Mana Motors an kalpui a, kum 10 chuang chhungin hma an sawn hle a, an laka Mizo mipui an fel avangin XUV 3XO an pho chhuah leh rualin lawmthu a sawi nghal a ni.

A tirah Mana Motors-in thawktu mi 50 vel ruaiin tunah hian 205 an awm a, India hmarchhaka dealer lian pathum zingah tel tawhin kuminah thla khata lirthei 200 hralh thei turin bituk an insiam a, la tlin rih lo mah se tun hnaiah car thar an nei nual a, changkang leh tha thei ang ber tura duan XUV 3XO an neih belh leh avangin beisei an neih san phah a, lei tum tan nghah rei a ngai dawn lo tih Dr. Marina chuan a sawi.

XUV 3XO hi diesel hmang chi Rs. nuai 10.99 atanga nuai 16.37 thleng a awm a, petrol hmang chi Rs. nuai 8.41 atanga nuai 16.94 thleng a awm bawk a ni.

Petrol hmang chi bikah hian chi hnih - TCMPFi 1.2 L 110bhp leh TGDi 1.2L 129bhp a awm a. Diesel engine erawh chi khat, CRDe 1.5L 115bhp a awm thung.

Chetsual theihna tam tak atanga mi veng thei tur, tunlai thiamna changkang, Advance Driver Assistance System(ADAS) LEVEL 2 a hmang tel a ni.

Booking hawn a nih atanga darkar khat chhungin booking 50,000 a awm nghal a ni.