Hripui leng vanga sa leh thlai man bituk tura sawrkar ruat committee chuan thutlukna siamin thuzawm tur an chhuaha, Aizawl Municipal Corporation huamchhunga hman tur niin, bazar theih hun hmasa ber atanga June thla thlenga hman tur sa leh thlai man an bituk a. Thuzawm turah hian thlai leh sate chu tehkhawng pakhatah khung khawmin grams/kilogram anga zawrh tawh tur a nih bakah a man (rate) bithliah a ni nghal bawk a ni.

Kan chawhmeh zawrh dan hi tehkhawng mumal awm mang loa zawrh a nih thin avangin a teh-khawng felfai tak siam hi a hun ta khawp mai a, a bikin thlai hnah lamah a awm lo lehzual a ni. Tun-hmaa tanga kan zawrh thin dan 'chheh, tehna no, tel, tawn' te hi ennawn a hun tawh viaua ngaihna a lian thin a, kan ti hlei thei lo fo thin a ni. Heng teh-khawnga hman mek te hi a leitute lam atang chuan lu ti haitu a ni fo thin a. A nihna takah chuan bazar tinah kan thlai hnah chheh tam lam leh a tel tiat a inang lo a, chawhmeh van lai leh tam lai a zirin a tamin a tlem a ni deuh ber bawk a, mipui lam an phun lungawi chang a tam awm e. Kan tehkhawng a mumal loh avang hian khawvelin an hman tlanglawn theih ang ber hi kan zawn a hun tawh reng a ni.

Chawhmeh zawrh dan tur bithliah tu Commitee in tekhawng atana grams/kilogram hman a rawt hmasawnna chi khat a tih loh theih loh a, a dinnaah nghet taka a din tlang a pawimawh dawn a, a man chungchang hi chu hman chhin phawta ennawn leh theih te pawh ni ang. Eng pawh nise tun lockdown emaw hripui len chhung chauh nilo nakin hun zela hman a nih theih nan tan la law law sela a duhawm hle mai. Local Level Task Force te tha chakna hman tum a ni a, Horticulture, Fisheries, AH& Vety department, Legal Metrology leh AMC lam te chu a kengkawh tur an ni dawn bawk a ni.

A tir lamah chuan kan buai deuh nakin a rinawm a, a zuartu bakah a leitu lam thlengin hriatthiam a har deuhin a rinawm a, beisei lawk tur pawh a ni ang. Hun a liam anga sawrkar lamin zirchianna nena hma a la zel a nih chuan tekhawng thar hi hman theih a nih a rinawm tlat a, khawpuia enchhin a hlawhtlin theih phei chuan hmun dangah pawh a hmun a zir ang zelin a lakna leh zawrhna man te pawh bithliah theih a ni ang.

Hetih lai hian Commerce and Industries Department chuan thlai leh sa zawrh mumal zawka a kal theih nan a man bithliah tumin Agriculture, Horticulture leh Vety Department te nen hma an la ho mek a, mipui lamin kan ngaichang a ni. Heng department te hian zuartu leh leitu lam tana hlawk ve ve tur an chhut a rinawm a, hemi rual hian a tehkhawng pawh hi thlak turin  hma rawn la law lawin tuna AMC huamchhunga hman mai tur nen hian inzul thei sela a that a rinawm a ni. Tehkhawnga kan hman mek   'chheh, tehna no, tel, tawn' te hian Mizo thlai zawrh dan a nih avanga kan paih ui a nih pawhin a 'rih' zawng anga siam rem theih tho niin a lang a ni. Sa leh thlai man a danglamin mipui kan phuna sawrkar lam erawh a ngawi vung vung thin anga lang hi tih reh a hun tawh khawp mai, a man thunun tur chuan a tehkhawng hi thlak a hun tawh a ni. Hripui vangin thil chhe tam tak kan hmachhawn a, hemi atang hian thil tha, mumal leh rintlak zawk a chhuah theih nan sawrkar hian theihtawp a chhuah a, he harsatna sutkian hi a mawha a lak hun tawh e.