Zirtawpni khan Commerce & Industries Director J.Hmingthanmawia hovin Core Committee on Inspection of Market Price(CCOIMP) chu an thu khawm a, Bazar a thlai, thei leh sa te man man zawka an lei theihna tura duan “The Mizoram Markets(Regulation & Facilitation) Ordinance,2020” chungchang bakah tunlaia thlai thenkhat leh sa man to fal deuh te zawrhna rate tihhniam dan tur te sawiho a ni.

CCOIMP meetingah hian ordinance hman theih a nih hunah pawnlam atanga lakluh thlai thenkhat te leh Mizoram chhunga thlai thar lak-khawm hna thawk turin Mizoram State Cooperative Marketing and Consumers’ Federation Ltd. (MIZOFED) leh Mizoram State Agriculture, Horticulture & Cooperative Federation (MAHFED) Ltd.. te chu mawhphurhna la tura rawt a ni a. Anni hian hlep sang tak um lovin thlai thar tute leh Bazara hralhchhuaktute inkarah hna an thawk dawn a. Hei hian tuna kharchhawngtute avanga man to taka thlai leh thei te zawrhchhuah te hi a tih tawp beisei a ni.

Mizoramin hun harsa tak kan tawh lai, lockdown runpui lai khan khua/veng hrang hrang Task Force te khan man tlawm zawkin mipuite hnenah thlai thar an pe thei reng a. Tunah tlema boruak a ziaawm deuh tawh hnuah pawh thlai man a to lutuk thin hi chu kan inennawn a ngai khawp mai. Thlai chingtute hian a hmaa an pekna ngai ang thovin an hralh niin an sawi a. Chuvangin thlai ching ve lemlo, a kharchhawng te hian an ti to ta em ni a tih theih a, enchian a tha khawp mai.

Sa rate chungchangah pawh a talhtute leh a vulh te hi an inpuh tawn niin a lang a. Sa sat hian a rate an tihto hian a vulh ten chumi hisap chuan an ranvulh man hi an ti to veleh nghal zel a, chuvangin awm,zia a nei tak tak lo a, a tawpa a tuartu chu mipui tho hi an ni.

Hetia sawrkarin thlai leh sa rate chungchanga hma a la tur hi a lawmawm a, engemaw laklawh laiah a tawpsan mai ang tih a hlauhawm hle. Sawrkar hi mipui tana ding a ni tih inhre nawn se, an hnungah mipui kan awm a ni tih hrerengin huaisen takin kal teh se.