Khawpuia thlai man a to lutuk sawihona Commerce and Industries chuan an buatsaiha, Mizoram Consumers Union, department dang leh thlai kharchhawngtute an tel a. Hemi hnu hian Cooperation Minister hoin sawihona buatsaih leh a ni a, chutah chuan sawrkar state danga tih dan home delivery leh thlai thartute tan bika thlai hralhna hmun chu Mizoramah tih ve tum a nih thu a sawi a ni. Minister chuan kharchhawngte chu thlai man ti to uchuak tute a puhin an chet dan chu a dem thu a sawi bawk a ni.

Kawng a tlang loh apiangin tualchhunga kan thlai thar lo to ve ziah hi thil thar a ni hran lo a, inzawmna nei lemlo niin a to chhan erawh kan ze dik tak tilangtuah a ngaih theih awm e. Thlai man to kan khelna a rei tawh ang hu hian a man fel taka bithliah a la ni hleithei chuang lo hi mak lamah a kal deuh tawh a. Kharchhawngin uchuak taka an tih to leh vang nia sawi a ni ber a. Hripuiin min nuai mek a, chutih rualin hun rei tak kawng dan a ni leh a, thlai man to tuartu chu mipui niin a bikin mi rethei zawkte an ni lo thei lo a ni. Eng pawh nise thil man chhiar hian awm tawk a nei hrim hrim bawk a ni.

Hetih lai hian man bithliah fel sa (man inziak) eichawp tam zawk erawh a to phah lemlo loa, kalphung mumal zawka zawrh a nih avangin a ti tote chu report-a hrem theih an ni lehzel a. Heta tanga lang chiang em em chu thlai zawrh danah hian kalphung mumal awm loh vang a tih loh theih loh a ni. A man thunun tura mawhphurtu sorkar pawh an hlawhchham tihna a ni.

Minister in thlai zawrh dan mumal zawka kalpui dan dap a nih tur thu a sawi hi thil chhinchhiah tlak tak a ni a. Tunhma pawhin thlai chingtute khai chhuahna tur duan a ni tawh thin a, a hlawhtlinna erawh kan hmu hleithei loa. Hetiang chuan thlai chinga eizawng tura infuih a chi tawh lo ang.

Thlai hralh dan tur (unit) hi hmunpui bikah chuan mumal taka hman a tul tawh niin a lang a, heng lo pawh hi thil tam tak a la awm ang. A mawhphurtu Vegetable Supply Chain Committee hian man bithliah fel tak nei tur chuan kalphung mumal tak an duan a tul a, a tul chuan zirbingna hial pawh neih ni sela a tha ang. Eng pawh nise sawrkarin thlai man bihthliah tura hma a lak tum dan hi a tlo tur a ni a, tun tum hi chu a hlawhchham thiang lo a ni.