ZALEN Jan 22, 2026: Vawiin khan Mizoram Agriculture Marketing Board (MAMB) chuan Aizawl Press Club-ah Press Conference koin thlai thar chi 5 lei leh hralh tur an sawifiah.

Mizoram Agriculture Marketing Board Co-Chairman Dr. KC Lalmalsawmzauva, Adviser to Chief Minister (Handholding) chuan, "Sawhthing hi February ni 2 aṭanga May ni 30, Aieng February aṭanga April, Hmarcha February aṭanga April leh Hmunphiah February aṭanga March chhungin lei a ni dawn a. Buhhum hi nikum November thla aṭanga leiin kumin March thleng lei a ni ang," tiin chanchinthar lakhawmtute hmaah a sawi.

"Sawhthing hi 'floor price' ₹ 50 a ni ang a, buffer stock kan siam dawn tawh lo a. Mizoram puma Secondary Collection Centre (SCC) 64 kan neih aṭangin a chingtuten an hralh tawh ang. A hralhtute hi Society member an ni tur a ni a, mimal tin bank account-a support price hi a luh dawn avangin bank account nei vek turin SCC tin te hriattir an ni," Dr. KC Lalmalsawmzauva chuan a sawi.

MAMB Co-Chairman chuan SCC tin te chuan an 'area' chin chauh ami sawhthing an hralh tur a ni tih a sawi a, "SCC tinah sorkar hnathawk supervisor leh assistant supervisor dah an ni ang a, anni hian Mizoram chhunga thar chauh lak a nih leh nih loh an enfiah ang. An signature a awm ngei ngei a ngai dawn a ni. Sawhthing bikah sorkar hi a leitu kan ni lo a, a thartu leh leitu suihzawmtu kan ni. Sawhthing reng reng harlh dawn taka a buk rit zawng chauh pawm a ni ang," a ti.

"A hralhtute sawhthing bag bikah 'tag' dah a ni anga ration card number, hming, khua leh phone number dah a ni ang. Sawhthing man tlawm leikhawma 'support price' beisei an awm a, heng mite thil tih hi kan pawm dawn lova khaw tin fimkhur turin kan chah a ni," tiin Dr. KC Lalmalsawmzauva chuan a sawi.

Hmunphiah bik hi kg.-ah sawrkarin ₹ 80-in a lei dawn a, Aieng lei tur pawl hi pasarih ruat an ni tawh a, kg.-ah ₹ 20-in lei tur a ni ang. Hmarchate ro hi kg.-ah ₹ 350-in lei a ni bawk ang. Sawhthing, Aieng, Buh hum, Hmunphiah leh Hmarchate rate hi a aia sanga lei duh an awmin leitir theih vek a ni.

#ZalenNews