Aizawl August 31, 2024 : Vawiin khan Agriculture Minister PC Vanlalruata leh Enviroment, Forest & Climate Change Minister Lalthansanga te chuan Sihphir Venghlun, Phunchawng, Falkawn leh Mel 3-ah te 'Agriculture Produce Wholesale Market', sak theihna hmun tur an enfiah.

Lalthansanga Minister chuan, "Aizawl dai vel mai ni lo, Zokhaw lamah kuthnathawk eizawng tamtak an awm a, thlai thar hralh chungchangah te harsatna an tawk nasa thin hle a. Kan thlai tharte pawh wholesale market kan neih chuan a hralhna kawngah hmasawnna a awm phah ngei ka beisei a ni," a ti.

Agriculture Minister PC Vanlalruata pawhin Wholesale Market hman tangkai dan tur hrang hrang sawiin,"Thlai thar vawn thatna tur Cold Storage leh kuthnathawktute hah chawlhna Rest room te bakah Market Building chhungah ATM booth te dah tum a ni a, heng hian kuthnathawktute tan malsawmna thar a thlen ngei kan beisei a ni," a ti.

Agriculture Produce Wholesale Market hi RKVY Scheme atanga sak tur niin Mizoram chhunga thlai thar te Aizawl kawtchhuah hmun li (4) ah sak tur a ni dawn a, Aizawl North leh South ah te hmalakna hmasaah an hmang dawn a ni.

Minister te hi Baryl Vanneihsangi chuan a bial chhungah lo tawiawmin, Agriculture Director Vanlalthlamuana leh Department officer ten an tawiawm bawk a ni.