December 14, 2022; Nizan dar 9 leh dar 10 inkar bawr vel khan Hortoki VC huam chhung, Dilzau ram ah thingzai a riak Meidum mi 3 te chu an riahna thlam kangah an boral a, police in thil awmdan an chhui chiang mek nia thudawn a ni.

ZALEN thudawn danin, kangmei chhuak a thi te hi Meidum mi vek, Vanlalpeka h/o Lallawmawmi, Meidum, Ordena s/o Becki leh Kungtea te an ni.

He chhiat tawhna thleng chungchang hi Meidum khawtlang chuan zing dar 2:30 bawr velah an hria a, Bairabi police te hriattir nghal an ni bawk a. Mi engemawzah in chhiatna thlenna hmun an pan nghal a ni. Police ten an tih tur an tih zawh hnuah, ruangte hi Bairabi ah postmortem niin, vawiin chawhnu lam khan an chenna in theuh ah vui an ni.

Thlamah hian boral ta mi 3 te bakah, thi zing a tel Vanlalpeka nupui Lallawmawmi te an riak a, he chhiatna hi nizan dar 9 leh dar 10 inkar vel a thleng niin, damchhuak awm chhun Lallawmawmin Bairabi police a hrilh danin, thingzai khawl a an hman tur petrol an buaipui laiin kangmei hi a chhuak a, kangmei chhuah laiin Lallawmawmi thlam pawn lamah zung tura a chhuah lai a ni a. Chhiatna thlen hnu hian phone signal a that loh vang leh a chi-ai nen zualko lawk thei dinhmunah a ding lo a ni.