Aizawl : Electric Veng YMA thlanmual thar panna tur lei dawh chu nimin (April 8, 2023) khan Aizawl North III bialtu MLA C Lalmuanpuia'n a hawng.

Lei dawh thar hi Electric Veng thlanmual hlui atanga thlanmual thar ri-na kawr kana dawh a ni a, UD&PA department sum cheng nuai 30 senga dawh a ni a, ni 80 chhunga dawh zawh a ni a. Feet 74-a thui, feet 15-a zau niin a chhuat pawh inchi sariha chhaha chhun a ni a, ban phunaah lung nghet taka rem a ni bawk.

Lei thar hawnna inkhawm hi Electric Veng YMA President C Lalrokhuma'n a kaihruai a, lei thar dawhna tura sum ruahmansaktu UD&PA department, an veng pa Lalchamliana, Home Minister, bialtu MLA C Lalmuanpuia leh an venga tlawmngai pawl hrang hrang, Local Council leh political party te chungah lawmthu a sawi.

A hawngtu bualtu MLA C Lalmuanpuia chuan, Electric Vengin thlanmual thar panna lei tha taka an dawh a hawng thei chu lawmawm a tih thu a sawi a, lei dawhna tura sum ruahman a tam lo chunga khawtlangin tha taka an dawh thei chu fakawm a ti a, tlawmngai pawl, Local Council leh political party te tanrualna lawmawm a tih thu a sawi.

Ram leh hnam humhalh chungchang sawiin MLA chuan mitin tanrual a ngai a, zirna uar te, taimak te, ruihhlo do te chu ram leh hnam humhalhna tha tak a nih chu a sawi.