Finance Minister Lalsawta chuan a nghet loa Department te'n Muster Roll (MR) an lak zat, ID leh chhinchhiahna dang nen thehlut teuh turin a hriattir tawh a, hun tiam a liam tawh hnuah pawh pawh sei ni zelin tumahin an la tih theih loa, press mite koin he thu hi a tlangzarh a ni. Kum tinin MR hlawhah hian Nuai 6,000 dawn a luang ral a, tam tak hi chu a lem an nih rin a ni a, hmuhtheih an nih loh avangin thlarau MR tih tawngkamte chu hmantlang lawn a nih phah a ni. He thu hi mipuiin an sawi fo thin a, mahse chinfel hleihtheih a ni chuang lo a, tun sawrkar pawhin na deuh hraiha hnuh a tum a, a pawtlettu a awm niin a lang tlat. Hun inthlak zelah ngaihdan tha lo deuh mai Mizo zingah a pianga, a thlentuah Union Territory hunlai puh a ni fo.. Sawrkar hna tau a teta lehkha zir chhuak hlimhlawt tan hna nghet a awm zel a, thlatin hlawh la an ni a, ‘a awm leh dawn' tih rilru an pua, ngaihsamna in a zui duh chawk bawk. Kut hnathawk an hmusit tira, lehkha zir tha duh lo sawi thaih nan an hmang bawk a. Heng hian vawiin thlengin nghawng a nei, khawi khawi emawah chuan hlet a chhuah nualin a rin theih a ni. Thlarau MR neih hi eirukna chi khat a ni a, ngaihsamna leh duhamna avanga lo piang a ni thei a, hnathawk miah loa sum hui luhna a ni a, kan haw tur a ni. Department thekhatah chuan an hotute an inhnamhnawih avangin an thawhpuite inhnamhnawih tirin a tu amah an tawng chhuak ngam lo niin an sawi fo a, mahse thup rei theih ni hek lo; thu a puta miin an hre leh zel tho a, an intihhmuh ti hial ila kan sawi sual tampui lovang. Thlarau MR zawnchhuaha chinfel hi tun sawrkar hian hlawhtlinpui ngei sela a tha ber anga, tun dinhmunah chuan Department te chungah zai a la zap hrih viau a, chanchinbumite'n an put darh hnu pawha awmzia a awm loh chuan hei ai naa rik hrawk a la ngai dawnin a lang a, a tulna vanga a ti a nih pawhin thiamloh chantir chi a ni lo a, thiam loh chantirtute chu inenlet zawk se a fuh ang. Sum harsatna namenlo ramin a tawk mek a, a chhan chu eng pawh nise sum hmanchhuahna inhrek a tul tawh a, a nihna takah chuan ram dangte’n kum tam tak an hman tawh kha a takin kan hmang ve tan dawn tihna a ni leih leih chauh a; chumi pawh kan zo lo a nih chuan hma hun a eng lo khawp ang. Sawrkar hnathawkte hi ‘vote bank’ tha tak ni mah se politician te chuan ramri kham chin neiha thudikah phei chuan an hlau tur a ni lovang. Tunah ti hian sawrkarin eirukna kar phawng tumin hma a la a, mipui te hian eng ang chiahin nge ‘corruption hi kan duh loh’ tih a lang dawn a ni. Bureaucrats te nge politician te corrupt zawk tih riruang pawh a lang thei mahna. Phunnawi ri a ring viau a nih chuan ‘eiruk chu ka chauhin in kan huaa, rilruah a nghet lo’ tih nemnghettu a ni mai awm e. Sawrkarin department laka a thil phut awm ngawih ngawih a ni a, sum harsatna tawk lo pawh ni ila thil nihphung tur a ni a; Budget chanve aia tam an chanpuala hauh tute hian ‘an ti mah mah tawh’ tiin ngaihdan a awm mek a, an chezia zirin mipuiin ngaihdan an siam anga chu chuan a hril thui khawp ang. Mizote hian ‘sum lakluh mila khawsa thiam te chu mi hausa an ni zawk' tih leh ‘khawia pawisa mah hian a daih seng lo’ tihah chian a hun ta khawp e. Rorelna tha nei tur chuan dik a ngai a, tuna sawrkar hnathawkte chezia en hian an hnawl angin a lang a; dikna kan duh tak tak em? Eiruk kan haw takzet em? Mi mal inzawt theuh ila. Eiruk duh lohtute chuan tuna sawrkarin MR lem chhui chhuah tuma a hmalakna hi an thlawp a tul ang.