Erik ten Hag chuan Financial Fair Play (FFP) vangin Manchester United tan January-a thlasaik bazar inhawng mekah striker lak luh chu tih theih a nih loh tur thu a sawi.

Manchester United forward Anthony Martial chu a inhliam avangin kar 10 chhung vel chhawr theih a ni dawn lo a. Heti a nih chuan Ten Hag hian tlar hma lamah Rasmus Højlund chauh chhawr mumal theih a nei tihna a ni a. Hetiang hi an dinhmun a nih avangin Dutch manager chuan tlar hmaa chhawr theih tur chu a ngaihven tho a, an tan mi thar lak luh chu a theih dawn loh niin a sawi bawk.

Ten Hag chuan, “Tlar hma lamah player kan mamawh belh tih chu ka hria a, mit pawh kan len kual a. Chutih rual chuan FFP vangin mi thar kan la lut thei dawn lo,” a ti.

“Marcus Rashford hi striker angin kan chhawr thei dawn tho a, mi dang pawh chhawr theih tur an awm dawn bawk a. Martial chu hun rei tak kan chhawr thei dawn lo a, a hmun ruak chu a zau dawn khawp mai,” a ti bawk.

Zanina Manchester United leh Newport County te FA Cup lama an inkhelh hunah goalkeeper Altay Bayindir chu a vawi khatna atan chhawr a tum tih Ten Hag hian a sawi bawk.

“Newport County lakah Bayindir chuan goal a veng dawn a. Tawn hriat nei tha tawh tak a ni a, Turkey ramah pawh club lian takah a khel thin a, kan club-ah hmun chan hun ngaichangin a awm reng a, tunah chuan a hun a thleng ta a ni,” a ti.

Bayindir-a hi nikum nipui lai khan Fenerbahce atangin an la lut a, khelhna hmun a la chang ta miah lo a. Africa Cup of Nations lamah Cameroon tana Andre Onana a feh chhuah avangin hmun a chang thei hlauh dawn a ni.