Aizawl; MJA Kolasib District chuan Kolasib Supply Kudam atanga buhfai ti chingpentute man chhuah leh dan hmanga hrem an nih theihna tura hmalakna chu a hlawh tling chho tan mek zel chu lawmawm an tih thu an sawi. Nimina thuchhuah an siamah Kolasib District MJA chuan mipuiten man tlawm zawka an lei tur buhfai bag 140 zet mai chu dan diklo in Kolasib Supply centre atangin October 8, 2014 khan phurhchhuah a ni a, he thil hi hriat a nih veleh Kolasib District MJA te chuan hma la nghalin a mawhphurtu nia hriat, DCSO PL Zohmingliana lakah hemi zan hian Kawnpui PS ah FIR thehluh a ni a. Hemi hnu hian PL Zohmingliana thurualpui ST Lallawm-zuala, DCSO Office-a LDC thawklai chuan dan lo bawkin buhfai bag 100 dang, October 10 chaw-hma lam khan a lo phurhchhuah tir leh a. Hei vang hian ST Lallawmzuala lakah October 16 khan Kolasib PS ah FIR bawk thehluh leh a ni a, ani pawh hi man zui nghal nimahse a mawhphurtu bera ngaih leh buhfai lakchhuah a nih theihnana hming sign tu, Kawnpui PS-a thubuai nei, tuna bail-a chhuak mek DCSO hlui PL Zohmingliana vawiin ni thlenga man a la ni leh lo hi hriattiam har kan ti hle a ni, an ti a. MJA chuan sawrkar mi chhawrlai, diklo taka che thinte hailang tura an hmalakna thlawptu district chhunga mipuite chungah te, Home Minister R.Lalzirliana leh FCS&CA Minister John Rotluangliana leh mi rinawmlo te diklohna chhuizuitu Kolasib SP leh a thawhpui officer te chetdan ah lawmthu an sawi a. Chutih laiin dan bawhchhiate hum an nihna tura pawikhawihlo, midang tuartir pawisa lo, police Officer zingah an awm chu zahthlak an tiin pawi an ti hle tih an sawi bawk a. Hei hian police fakawm tak takte hmai a ti balin mipui ten police te laka rinna an lo nghah thin chu a tichhe thei niin an sawi bawk.