Aizawl; Zoram Energy Development Agency (ZEDA) chuan thli hmanga power siam tumin hma a la mek a, tunah hian Chalfilh tlangah enchhinna kalpui mek a ni a. Naktuk hian ni leng awh workshop buatsaih neih tum a ni bawk. ZEDA hotute hnen atanga Zalen thudawn danin thli hmanga power siam theih anih leh nihloh (wind study) hi Reiek, Hmuifang, Mamte leh Chalfilh ah te metre 25 a sangah enchhin a ni tawh a, mahse duh anga thli a thawt thatloh avangin duhthu a samlo vek a. Tunah hian Chalfilh ah metre 50 a sangah enchhin leh mek a ni a, hemi hnu hian metre 80 a sangah tihchhin leh tum a ni a, beiseina sang tak an nei tih ZEDA hotute chuan an sawi. Ni eng hmanga power siam (solar energy) lamah pawh theih tawkin tan an la tih ZEDA thawktute chuan an sawi a. "Mizoram ah hian fur a rei deuh tih thu lovah chuan ni eng kan hmuh hi a temperature a san lutuk loh avangin duhthusam a ni a, hmarchhak bialah phei chuan a tha ber kan ni hial ang," an ti bawk. Workshop buatsaihtu Harry Dhual, Global Energy Private Electricity, CEO chuan, “Mizoram hian ni zung leh thlir chakna hi thingtlang lamin an tangkaipui kan ring a ni,” tiin ZALEN a hrilh a ni. Naktuk November ni 10 chawhma dar 10 atang hian Aijal Club ah M/S Eternity Partners leh ZEDA tangkawp huaihawtin 'Off-grid Renewable Energy Access Projects in Mizoram' tih thupui hmangin seminar neih a ni dawn a. Hetah hian electric hrui line pangngai atang ni lo ni zung chakna, lui luang chakna, thing leh mau hmanga kawlphetha siamchhuah inzirtirna leh sawihona neih a ni dawn a, state chhung leh pawna mithiam ten thu an sawi ang.