- Zosangliana (Zotea) Tuna Mizorama cheng mek hi kan vaiin nuai 12 vel kan ni a, kan la tlem hle a ni. Kan thenawmah hnam lian pui pui maktaduai telten min hual vel a. Kan thenawm state tenaute chu a ram neitu (Native/Aborigin) te chu hnam lian zawkten an chimpil tawhin, chimpil mekin an awm a ni. Tun hnaia Vishal Mega Mart, Aizawl Bawngkawna hawn thua thu inchuh awm mekah hian, thenkhatin ‘Thliarkar rilru kan put chhung chuan kan changkang thei lo vang,’ an ti a. Thliarkar rilru paih vek ngam dinhmunah kan ding em tih erawh kan inenfiah a ngai hle ang. Mizoram hian vanneihna tak kan nei a. British-in min awp hma atanga humhalhna tha tak dawng kan ni a. A nihna takah chuan British hoin min awp hma, kan ram chhung pawh an la rawn dai hma daih atangin Mizoram humhalhna dan hi an lo siam tawh zawk a ni. Mizo Lalten an ram chhung nia an ngaih Sairamchhuah nantea an hman thinah, British sumdawng pawl East India Company chuan saite manin, ram ngawte chu thingpui huan atante an rawn vat ta a. Mizo lalte chuan an sai man thinahte chuan chhiah tal pe turin an ti a. Mahse British ho chuan chhiah chu an pe duh lo va. Chuta tang chuan Mizo lal leh British ho inkar chu a lo buai chho tan ta a ni. Hetih hun lai hi 1775 vel atanga intan niin ‘Mizoram Marches toward Freedom’ Laldenga ziah, Proloque Isaac Zoliana ziahah a chuang a ni. Mizo lalte chuan British mi chhawrte chu an run fo va, salah manin a then an that bawk thin a. 1775-1890 inkar hian Mizo lalte hian tum 60 chuang English leh an hnathawkte hi an run niin chhinchhiah a ni. Kum 1871 Febuary thla-ah Sailam lal Bengkhuaia leh a pasalthate chuan Alexandrapur thingpui huan chu runin Dr. James Winchester chu thatin a fanu kum 6 mi, Mary Winchester leh mi dang salah an man bawk a. Hemi hma pawh hian Mizo lalte hian English ho hnathawk eng emaw zat thatin salah an man thin bawk a. Hetiang an lo nih chhoh takah chuan Mizo lalten an ram chin an humhalh chhunga hnam dang - sap emaw, vai emaw reng reng lut/kal tur chuan Cachar Deputy Commissioner phalna an la tur a ni tiin thuchhuah an siam ta hial a. Hemi rual hian Bengal Eastern Frontier Regulation 1873 behchhanin Lushai Hills-a lut tur reng rengte chuan Inner Line Permit (ILP) an nei ngei ngei tur a ni tih a ni ta bawk a. British hoin kan lalte hneha 1890 atanga min awp hnuah pawh Inner Line Permit (ILP) hi hman chhunzawmin, India hnuaia kan awm hnuah pawh paih a ni chuang lo a ni. Mizoram Independence Movement 1966-a a rawn chhuah takah phei kha chuan MNF Underground sorkar khan ‘Quit Mizoram Order’ (Vai hnawhchhuahna order) hial an rawn siam ta a. Hei vang hian vai Mizorama lo awm sa pawhin Mizoram an chhuahsan ta hum hum a ni. Kum 1986-a Mizoram Remna (Accord) Memorundum of Settlement ziah a lo nih khan Inner Line Permit chu Accord Bung 4:8-naah telh niin “Inner Line Regulation tuna Mizorama hman mek hi Mizoram sorkar rawn/thu lo chuan tihdanglam emaw, paih emaw theih a ni lo vang” tia dah ngheh leh zual a ni ta bawk a ni. Hetianga humhalh mek kan nih lai hian a pawp lai zawnga Mizote min chimpilna tur kawng dap reng an awm tih hi kan hriata kan fimkhur a ngai tak zet a ni. Thuamhnaw leh eichawp lam zuar company leh he lama sumdawng vai hausa tawntaw tam tak an awm a. Chungte chuan thei nise Mizorama rawn inzawrh hi an châk ngawih ngawih ang tih hi kan ngaihtuah ngai em? Hetih mek lai hian Mizo hian hmeichhe puan ven chi bak kan mamawh tur silh leh fen lam pawh kan la dekchhuak si lo va. Vai etc siam silhfen kan mamawh bawk si, Licensing Regulation/Trading Regulation Mizote tana him leh Central sorkar pawm theih kan la duang chhuak thiam si lo hi a manganthlak tak zet a. Kan mi thiam rualte hian bengsika an ngaihtuah thuai a ngai hle a ni. Kan duh dan ringawt hi India ram pum thlira lo ngaihtuahtu Central sorkar, President meuhin a pawm a ngai si a ni. Kan ram leh hnam, sakhuate him thawkhatna tur hi chu Mizoram Accord-ah khan kan neiah ngai ila. Mizoram Accord (Mizoram leh India sorkar Inremna) Bung 4:3 (ii)-ah khan ti hian ziak a ni a. “India Danpuiah engpawh lo chuang mah se Parliament-in eng dan pawh pass sela, heng thilah te hian Mizoram sorkar thu/remtihna lo chuan Mizoramah hman ve theih a ni lovang” - (I) Mizo Sakhua leh khawtlangin a hman danah (II) Mizo hnam dan leh a hman danah (III) Mizo hnam dan hnuaia Civil leh Criminal thubuai rel danah (IV) Ram neitu nihna leh a inhlan chhawn thuah te Amaherawhchu, he thu hian hemi atana ni ruat hmaa Mizorama UT-a dan hman mekte a huam lo vang (53rd Amendment Act 1986) (Notwithstanding in the Constitution) (a) No Act of Parliament in respect of- (I) Religious or Social practice of the Mizo (II) Mizo Customary Law and procedure (III) Administration of Civil and Criminal Justice involving decisions according to Mizo customary law (IV)?Ownership and transfer of land, shall apply to the State of Mizoram unless the Legislative Assembly of the Mizoram by a resolution so decides. Providing that nothing in the clouse shall apply to any Central Act in force in the Union Territory of Mizoram immediatly before the Commencement of the Constitution (fifty third Ammendment) Act 1986 tih hi India Constitution Article 371 (G)-ah ziak luh a ni. Mizote sakhua, khawtlang nun leh hnam dan te, Mizote hnam danin rorelna a kalpui dante, ram neitu nihna leh inhlanchhawn thuah te thuneihna tawp kan nei a. Kan him thawkhatah ngai ta ila. Hetihlaia kan tlakchham ei leh bar, silh leh fen a lova kan awm theih lohah ngei hian min rawn runin, min run theihna kawng hrang hrang an rawn dap zel dawn a ni. Riltam leh kekawr mawng tet nen kan awm thei lo tih hi vai ho hian an hre kiau tih hi hria ila. Kan sumdawng silh leh fen zuartute, ni tin mamawh ei leh bar lam zuartute hian chintawk neiin hlep tum ila. Burma sumdawng pakhat chu a thlen inten a thil zawrh an dawn hniam ta lutuka “Tlem tlem chu hlep ve ka duh ve a” a ti e an tih ang ema ‘rate’ hniama zuar tur chuan kan phut hauh lo che u a nia. Vishal Mega Mart mai lo pawh Company dang pawh rawn luh tum an awm zel ang. Mahse, kan Mizote ngei behchhan lo chuan an lo lut mai thei lo vang. Dan leh hrai kan neihte tha taka zawm leh Mizoten a hlawkna tam tak an tel theih ngeina tur ngaihtuah tel hram hram zel ila. Mizo Carbon te anga dawt inchherchhuan uaiha hlawkna tel tum lovin, kan Ram leh Hnam himna tur dah pawimawh zel ila. Tun atanga kum 50/100-ah Mizoram leh hnam hian par a chhuah a, a vul zel theih nan te, kan tu leh fate tan ram nuam leh chenna tlak a nih zel theih nan inveng ila. Tuna sum um luat avanga kan ram zimte i lo hralh mai chuan, inthlahte pawhin an tuar ve dawn tho a ni. Mizoram a boral chuan tunge dingchhuak ang tih hi i ngaihtuah ngai em. Thliarkar rilru hi paih vek ngam tur dinhmunah dingin kan inhre chiah em le?