Aizawl April 14, 2023 : MNF President chuan, "Tho rawh u, kan dingchhuak leh dawn, tia rawn au tur che u in vawiinah hian ka lo kal a ni. Eptuten social media-ah kan sawrkar hi a chhe thei ang bera min beiin, Zoram chhe lailet der angin an chhuah a, mipui leh thalaite sawrkar laka beidawng ngawih ngawih turin an fah a. Chuvangin, beihpuiin kan bei ve tawh dawn a ni," a ti. 

MNF Serchhip East leh West Block, Joint Block Conference, Serchhip Auditorium-a neih a hmanpui naah Chief Minister leh MNF President ni bawk Zoramthanga chuan, "LMC inthlanah kan tla fai vek mai a, hreawm kan ti a, kan zak em em a ni. Nimahsela, Joshua ho anga Israel fate nen an diklohna lai an inenfiah ang khan theih tawpin kan bei leh dawn a. MNF hotu pawimawh zawng zawng kan thukhawm tawh a, chuta kan thu chu, 'Tho rawh, enge kan tihdik lohna lai, enge kan chaklohna, kan khingpuiten min beihna zawng zawng hi engnge ni,' kan ti a. Kan lo lungmuan deuha Lunglei-a kan tlakna hi inkaihharhnan kan hmang dawn," a ti.

MNF President chuan Nationalism chungchang sawiin, "Nationalism-in Israel fate a nghawng ang chiah khan Mizo Nationalism movement-ah Pathianin min luh tir a. Vawiina hnamdang laka kan mawina chu hnam movement hi a ni, Assam laka kan mawina chu hnam movement vang a ni. Chu hnam movement chu India pawhin a hnawk a tih ber, kha leh chen kan inkah nachhan kha a ni. 1961 October-a din MNF hi harsatna hrang hrang paltlang vekin vawiin ni a, party senior ber pawl a awm nachhan hi kan thuthlung, Pathian leh kan ram tan, tih kan vawn tlat vang a ni. Tui anga nghet lo hi Lalpa'n a lungphum phumnan a duh lo, chuvangin Zoram mipui hian kum 40 deuh thaw kan la chhin lo bawk a, chhin tlakah kan ngai bawk lo a ni," a ti.

Zoramthanga chuan, "Opposition ten min sawiselna SEDP leh SASCI-te hi Pathianin malsawmna min pek a ni a. MNF hian harsatna tam tak kan hmachhawn tawh, nimahsela Pathianin min hruaichhuak leh zel a ni, tih hi i pawm ngam ang u. Vanduaina a kan ruat hi malsawmna alo ni zawk thin a ni," a ti a. "Kan hnam movement engmahlo a chhuah tumtute an hniam sat sat zel a, thalaite pawhin hmana inphal loh kha a ni, kan Pathian pawhin a phal bawk lo. Chuvangin kan hnam movement champion-na hi kan thalaite hnenah Pathian thlarauin a dah a, vawiin thlengin a alh zel a ni. Party-in advangtage lak duh vanga sawi nep tumtu te hi thalai ten kan phal tur a ni lo," a ti bawk.

MNF Adviser J. Malsawmzuala Vanchhawng pawhin thu sawiin, Party worker ten thawhhohna tha an neih that zarah Serchhip bialah hnehna an chan ngei a beisei thu a sawi a. MZU-a political talk neiha a thusawi mi thenkhatin an helh thu sawiin, "Inngaihbel party an lo awm a, heng zawng zawng hi kan dinhmun min tikangtu zawk a ni hi lawmawm ka ti hle a ni," a ti.

J Sawma chuan, "Mi thenkhatin sum hman chungchangah kan CM, Finance mimister na takin an bei thin. Ama'rawhchu, vawiin thlengin ei leh bar, gas leh thil dangah kan hnianghnar em em a. Kan sawrkar hian nasa takin Serchhip bialah hmasawnna hna a thawk a, nuai za tam tak sengin Administrative Building turte min sak sakin, Bazar hmun turin PWD department-te min sawnchhuah sak turin hma a la a. Nasa taka hma min laksaknaah sawrkar chungah lawmthu kan sawi a ni," a ti a. "Kan sakhuana leh mahni khingpuite hnehsawh taka deuhsawh vak vak te hi keini chuan kan ti ve tur a ni lo a, kan CM hi nasa taka elhsen leh diriam a ni chungin a khinglet ve ngai lova, chu chuan pa nih a tlinzia a pholangin ka hria a. Midangte thiltih that hmu thei miah lo, midang khak reng ho hi hruaitu tha an ni ngai lo," a ti.