Aizawl: Health & Family Welfare Department (H&FWD) chuan thenawm state te a hri leng mek Japanese Encephalitis laka invenna turin hma a la mek. Department lam hotute atanga thudawn danin tunah hian Manipur lama Japanese encephalitis a len nasat avangin Manipur hnaih lamah hma lak a nih thu Zalen an hrilh a. Japanese encephalitis chu thosi seh atanga kai theih a nih thu department lam hotute chuan an sawi a, hemi vang hian Manipur hnaih lam khaw hrang hrangah inralrin a ngaih thu leh department lam hnathawktute pawh an inrin theihnan hma lak a nih thu an sawi bawk. Thosi piantir loh chu a inven dan tha ber a nih rih thu department hotute chuan an sawi a. Thosi pian theihna tur tui tling te leh thil hrang hrang tihbona turin khaw hrang hranga Sub-Centre ah hnathawh dan tur ruahman a nih dawn thu leh sum pawh ngaihtuah a nih thu an sawi bawk. Thosi pian loh nan hian nasa zawkin hmun hrang hrangah DDT kah mek anih thu an sawi bawk. H&FWD hotute chuan Mizoramah an hriat theih chinah vei hmuh chhuah an la nih loh thu an sawi a. Central lamah vaccine dil a nih thu leh vei pakhat mah hriat an la nih loh avanga an rawn pekchhuah theih loh thu an sawi bawk. Japanese encephalitis hi malaria ang deuh a thosi seh atanga kai theih natna a ni a, a natna lo lan chhuah hun hi ni 5-15 chhungin a ni a. Luak, lu na, khawsik leh chet vel hrehawmten a lang chhuak a, thluak lamah hnathawkin nikhaw hre lo hiala awm theihna a ni a, ngaihthah chuan thihna hial a thlen thei niin thudawnna chuan a tarlang. Tunah hian he natna hi thenawm state Assam leh Manipur-ah te a leng mek a ni.