Thu awihna

Ramchhana Hmar
Phuaibuang Engtia rei nge kan him tawh tih aiin, engtia rei nge kan la him dawn tih chu khawvela hripui leng mek, Covid-19 laka Mizo mipuite rilrua zawhna awm chhan theih si loh a ni ti ila kan sawisual kher awm lo ve. Khawvel huap ang pawha hri a len tawh chuan chuti maiin a reh mai mai lo khawp mai a, kum 2 te hi chu a daih tlangpui thin a, tuna Covid-19 hri leng mekah pawh hian tun dinhmunah chuan kan ram chu kan la him rih niin a lang a, he kan himna hian engtik thleng nge a daih ang? Kan himna kulhbang hi engtikah nge, eng hunah nge hripui hian a lo sut leh dawn kan hre si lo va, a kai hmasatu ni turin tumah kan induhsak lo va, kai tur pawhin kan induhsak hek lo. Mi tinte kan fimkhur hle a, he kan fimkhurna hian tha a thlah palh ang tih chu thil hlauhawm tak a ni.
Ram rethei kan ni a, sum leh pai chu sawi loh inenkawlna hmun tur damdawi in kan neihte pawh ram dang neihte nena tehkhin tham ala ni lo, eng kawngah pawh he hripui tuar ve tur hian kan neihin ala tlin mawlh lo a ni.
Kum 1918 khan khawvel pumah hripui a leng a, kha hripui avanga thi te kha indopuia thite ai pawhin an tam a nih kha, kum 1919-ah hripuiin Mizoram a lo nuai ve ta tak tak mai chu, mi tam takin nunna an chan a, kha hripui khan Mizoramah chuan Hriangtuinek (Hriangtuinek hi Phuaibuang khaw hmasa a ni a, tuna Phuaibuang khua awmna atang khian hla lo te a ni) khuain an tuar ber awm e. Tlemin Hriangtuinek lam hi han hrut leh lawk ila, hripui leng avang khan mi kha ti zatin nunna an chan phahna leh Mizoramah pawh khaw kilkhawr ber pawla mi khati zatin nunna an channa chhan kha, thu awih loh vang ti ila a dik ber awm e. Hriangtuinek khuain kha hripui an kai chhan chu, Manipur rama Hriangtuinek mi khualzin hnen atangin a ni a, Manipur-a hri vei an khung hran ava en avangin hri a kai a, chu mi kal zel chuan, mi tam tak nunna a lak phah a, mi 380 laiin nunna an chan phah a ni.
Hriangtuineka hri lo pu luttu kha tunah hian kan dem thar leh ta e, tihna lam ni lovin; he mi thuah hian zir tur tha tak kan neiin a hriat a, a pawimawh ta em em chu thu awihna a ni, mi dang tlawhpawh theih loh tura hri vei khung hran en pawh en loh tura an tih lo hmu chak tlat a, lo en luih avangin mi tam takin nunna hlu tak an chana ava pawi tehlul em, thu awiin kha hri vei kha hnaih lo se, kha ti em em kha a ni kher angem?
Ni e, hei Covid-19 hri leng avangin eizawnna leh tulna dang avanga Mizo hmun hrang hranga awm ten kan rama kan awm hmun theuh kan pan khawm mek zel a, kan in ngai a, kan inthlahlel a; mah se, tun tuma chhungkua kan intawh khawm dan leh kan rama kan lo haw dan hi chu a ki a dang deuh tih kan hriat nawn fo hi a va tha em! Thu awihna a pawimawh hle a, sawrkar thu ngaichang thiam zel ila, kan nei ve alawm, kan in enkawl ve thei mai ang tih lam ai chuan engtin nge sawrkarin thu a chhuah a, kan himna turin eng thu nge kan zawm zel dawn tih lam hian kan ngaihtuahna luah mawlh teh se.
Ram hrang hrang atangin Mizote kan haw mek kan tih tawh kha, kan inpawlh leh ta nawk mai, heti a nih chuan fimkhur zual sauh sauh kan mamawh tihna a ni a, loh theih loh a nih loh chuan pawn chhuah loh te, thianhova lui kal leh lock down boruak kan ning tawh lutuk tih avanga chhuah sekte hi chin tam loh a tha hle mai, tuna pawn lama i hlim chakna khan, nakin lawkah hlim lohnaah a hruai lut thei che a, pawn a i chhuahvah chakna khan pindan chhungril zawkah a nawr liam thei che tih kha theihnghilh suh. Mi pakhat thu awih lohna avanga tawrhna kan sawi tawh khi vawng reng ila, he hripui lak atanga him i duh tak tak a nih chuan mamawh nei tlem la, thu awi la, i khabe ni lovin i hmui tuam uluk ang che.
Ram hla tak atanga mahni rama lo haw teh pawhin kan ram inthlakhlelh tawh turzia chu kan hria e; kan ram in lo thlenga hripui in lo tlansan a ni lo va, he laiah haw ve hun chhung tiin remchang zawngin chhuak sek lo ngam ula, zep lovah chuan a ruk tak chuan he laia lo awmte hian kan hlau ru che u a nia. Ni 14 tal lo inkhung phawt la, i him a, kan la him zel a nih chuan hlimzai vawrna hun ala tam dawn lutuk a nia.
Tunah hian hripui len hma ang deuh tho khan kan zalen a, zirna inte kan la hawng lo va, sumdawnna hmunten sawrkar thu an la zawm tha rih a, chuti ni lovah chuan kan kawngpui pawh a lun leh ta mep mep khawp mai, khawpui chhungah bik chuan veng tinah duty an awm chungin, chung duty-te paltlang thei tura badge awrh thei apui kan tam em em bawk a, kan zalen leh ta viau mai, zalenna zawnga hlauhawm ber a ni hial awm e, tun dinhmunah chuan zalenna ngai pawimawh apiang lo hlau phawt mai teh. Sawrkar thu awih la, thu zawm la, nang leh kei hi kan him mial mahna. Pathian thu pawhin thu awih/thu zâwm hi thil dik a ti a, thil dik lo titu nih kan duh lo theuh a; chuvangin, thu hi awih em em phawt mai teh ang u.

DOWNLOAD OUR APP

Read latest news on your phone

Thu awihna

Latest News & Chhiar Hlawh