ZALEN Sept. 26, 2024; Tun hnaia Pachhunga University College-in blood donation camp an neiha thisen an pek zinga 60% chu HIV positive a nih thu a darh a. Hei hi thu dik lo hulhual a ni.

Association for Voluntary Blood Donation (AVBD) in thuchhuah an siama an tarlan danin, thisen pek reng reng hi a thianghlim leh thianghlim loh endik vek thin a ni a, HIV mai bakah, natna dang lakah a fihlim leh fihlim loh endik vek a ni. PUC zirlaite thisen pek pawh endik vek a ni a, HIV positive tam tak an awm anga sawi hi thu dik lo a ni tih finfiah a ni.

Miin thisen an pekte endiknaah HIV positive rinhlelhawm a awm a nih pawhin a hre tur tak te bakin an hre ngai lo a, mipui vantlang tan hriat theih a ni lo. Mipui vantlang hriat tura puanzar hi dan kalh a ni bawk.

Tun thlengin thisen pek endik tawhah hian HIV positive rinhlelhawm tlemtê a lo awm tawh a, thisen pek percentage atanga chhût phei chuan a hniam hle a ni. A bik takin voluntary blood donor ațang chuan HIV positive an awm ngai lo tih theih a ni.

"PUC zirlaite'n thisen an pekah HIV positive 60% an awm anga thu thehdarh hi dâwt muhlûm a ni a, AVBD chuan pawi kan ti tak zet a ni. Tun hnuah chuan thisen pek chungchangah leh tlawmngaia thisen petute tihnual thei thu dik lo thehdarh tawh lo turin mi tin kan ngen a ni," tiin an thuchhuahah chuan an tarlang.