Kum 2020 Krismas leh Kumthar vuakvetah sawrkar chuan mipuite halpuah leh halmawi hal lo tur bakah sialai lem, a mu kapchhuak thei te zuara hmang lo turin mipui a ngen a. He an ngenna hi mi tam takin an zawm laiin sawrkar leh tlawmngai pawl te ngenna ngai pawimawh lova hal lui mi engemaw zat an awm a ni.

Veng tam tak halpuah leh halmawi hal lui an awm laiin sawrkar ngenna ngai pawimawha Krismas leh Kumthar vuak veta halpuah leh halmawi khapna thupek zawm veng engemaw zat an awm a. Heng thupek zawma hma la tha Branch YMA 6 thlanchhuah te hnenah tunhnai khan Central YMA chuan chawimawina thuziak leh tangka fai a hlan a ni. Hei hian thuawih kawnga min kaihruaitu ni thei se a duhawm hle.

Halpuah leh halmawi te hi mihringte hriselna atana pawi thlen thei a ni a, nasa taka boruak ti bawlhhlawhtu anih mai bakah damlo leh tar chak lo zawkte tan chuan chauhpuina tham a ni a. Chumai bakah tul lova sum tam tak senralna a ni bawk. Heng te avang hian mitin ten hlim leh muanawm taka an hman theihnan sawrkar pawhin khapna thupek hi siam a ni.

Pathian zara dam taka awm chuan Krismas leh Kumthar hi kar lovah kan thleng leh thuai dawn a, sawrkar pawhin halpuah leh halmawi khapna thupek hi a chhuah leh ngei turah ngai ila. Hun kalta te ang mai mai lo deuha thupek ngai pawimawh lova hal lui te chu na zawka a hrem ngei a pawimawh ang.

Central YMA ten dan zawma halpuah leh halmawi hal lo veng te chawimawina an hlan hi a ropui tak zet a. Hei hi inzirtharna ni thei se, thuawih te hi chawimawina hlan zel ni thei se, chutih rual chuan thupek awih lo te erawh hrem ni zel bawk se khapna chhuah thin hian awmzia a nei thui lehzual ngei ang.