Hunpui pahnih kan paltlang zoa, kan hmachhawn leh vai liam dan inang kher lo mahse Kumthar kan thleng hi lawmna tham a ni hrim hrim. Kumthar Chibai inbuk phawt ila. Zalen ‘chhungkua’ kan dam tlang maw? Mediaa chhiartute 'Chhungkua' tih tawngkam hmang hmasa bertu te'n kan han hai san renrawna, Kumin atangin kan tiri leh tan tawh turah ngai phawt ang u aw. Broadsheet paper Editorial ah hian thuchah angin ziah a ni vak loa, mahse issue dang ang lo deuhin Kumthar Thuchahin bul han tan rawih teh ang. Mizo hian vawi khat damchhunga nun kan hman dan hi tunaia awmze nei hian kan thei ang em? tih zawhna hi mi tamtak rilrua awm niin a lang thin a. Hmasawn duhna avangin Kum Thar ah thutiam kan siama. Chutih rualin bawhpelh pawha hlawhchham loa a hlawhtlin nana hma lak tauh tauh ai chuan a kum leh atanga beihthat atan kan dahtha ta mai em maw ni le,? tih a awl duh rum rum e. Hei hi kawng hranga kan rilru puthmang ti chiangtu pakhat a ni thei mai em? Thalai zinga hnathawh nachang leh tum hauh lo an pung zel tia an sawi thin te nen lam hian a inzawm zel em? Chutih rualin nu leh pa thahnemngai tam takin an fate tan thawk inti siin hun erawh an pe hman der lo a. ‘Bungrua emaw thil eng eng emaw - material kan tihte’ te chu chhungkuaa naupang awmtleitu an ni mek a. Nu leh pa ten fate tan hahthikula an thawh lai hian an mamawh zawk 'an tana hun pek’-ah tan kan lak a ngai tak zetin a hriat. He thu ziaktu pawh hi a bang hauh bik lo. " Mihring leh bungrua inan lohna chu ‘nunna’ a ni a, nunna nei lovin ‘nunna leh ngaihtuahna hmang thei,’ enkawl emaw aiawh tling tura kan ngai nghet tan a nih chuan khawthlang ram kalkawng kan zawh tan tihna a ni ang. Hei hi hmachhawpah neih phawt mai ang u. Kum hman nuam ule!