Aizawl: MNF Vice President Dr. R.Lalthangliana chuan, “Kan sawrkar hunah thuneihna sem rual (decentralisation of power) kan kalpui dawn a. The Mizoram Local Self Government Act, 2019 (Zoram thar dinna tura dan ruangam) chu Assembly Session hmasa berah kan pass dawn a ni,” a ti. Zirtawpni kalta khan South Vanlaiphaiah thu sawiin Dr. Thangtea chuan, “Local Government Committee-ten an khawtlang mamawhte chu District Level-ah an thlen ang a, chu chu State Level-ah an thlen leh an­­g a. Khawtlang mamawh hrang hrang School, Community Hall, Side Drain, Step, Culvert, Zunin siam, kawnglaih leh thil dang dang pawh tual chhung sawrkarin an thawk tawh ang a, corruption leh sum pelhe tam tak a bo phah dawn a. Minister leh MLA-te thuneihna a tlem ang a, Zoramthar hmel min hmuhtir dawn a ni,” a ti. Dr. Thangtea chuan, “Congress party kalphung chu Indira Gandhi hun lai atang tawhin mihausa an hausa tual tual a, mi rethei kan rethei tial tial a, mi retheite retheihna hmanga suma inlei tlin leh ringawt hi an kal phung chu a ni,” a ti bawk.