Kan hma lawkah rokhawlhna lian tak a awm a nih loh chuan Mizoram chuan MLA inthlanpui kan hmachhawn leh dawn a, political party hrang hrang te pawh nasa takin an inpuahchah a, mipui ngaihzawn nih tumin an hmalak tum dan te an puang dum dum a. Nakin lawkah chuan thlantlin an niha mipuite hnena an tih tur ‘manifesto’ pawh an puang thuaiin a rinawm.   India ram hi inthlang ram kan ni a, kan ram roreltu sang ber Parliament member atanga tualchhunga roreltu tur thlengin mipui ten kan duhzawng kan thlang thin. Kan thlan fuh chuan mipuite kan vannei a, ramin hma a sawn thin. Kan thlan sual erawh chuan mipui leh ramin a tuar thung a ni. Chuvangin, ram roreltu kan thlanna turah pawh uluk taka ngaihtuahna kan sen a, ram tana tha ber tur kan thlanchhuah thiam a pawimawh hle ang.   Kan hma lawka MLA inthlanpui kan neih turah pawh political party hrang hrangte chuan mipui hneh ngei tumin tawktarh tha deuh deuh an rawn chhawpchhuak leh ngei dawn a, hetah tak hian mipuite kan pawimawh leh dawn a ni. Party thenkhat chuan thil itawm tak; mahse, a taka tihhlawhtlin theih lohte pawh an rawn tiam leh mai thei, hetianga ti an awm chuan mipuiten kan hnawl ngam a tha ang.   Chutih rual chuan mipuite pawhin kan politician-te intiamtir kan ching hi ram tan chhiatna a ni thei bawk. Tu khua emaw pawl leh mi mal thenkhatten mahni hamthatna beiseiin politician-te hnenah phut an lo nei thin a, politician-te lahin vote an duh bawk si avangin ngaihtuah ching lovin an ‘tiam’ leh ngawt zel bawk thin a. Thlantlin an nihin a tiamtirtu mipui lamin an intiamna kha tihhlawhtlintir ngei tumin meikawhin kan nawr leh thin bawk si a, tam tak chu tihhlawhtlin theih loh leh remchang lote a lo ni bawk si nen buai nuai nuai a innawr pawh a thlen phah hial thin anih hi! Chuvangin mipuite pawhin khawilai emaw hamthatna leh hmasawnna ringawt buaipui lovin ram pum ngaihtuah chungin politcian-te intiamtir talh tum lo ila. Chutiang bawkin politician-te pawhin vote duh vang ringawt chuan tihhlawhtlin theih loh leh remchanglo hi chu ‘Tiam lo’ ngam bawk se. Ngaihtuahna fim tak hmangin ram pum tana thatna tur ber kan zawn theuh chuan Mizoram hian hma a sawn ngei ang. Kan hma lawka inthlanpui lo awm turah hian ‘Tiam Politics’ hi kalsan ngam ang u.