ZALEN Sept. 17, 2025 : CSS hnuaia thawk intelkhawm All Mizoram CSS Employees Coordination Committee (AMCECC) chu an thil ngiat nawr nan vawiin atangin tiamchin awm loin an chawl dawn.

Aizawl District Magistrate-in thla hnih chhung sawrkar office awmna hmun hrang hrangah mi 5 aia tam punkhawm khapna tichhuak mahse Aizawl district-a CSS hnuaa thawkte chu nimin khan Vaivakawna Joint YMA Field-ah pungkhawmin lungawi lohna an lantir a. He hunah hian AMCECC General Secretary Vanlalpeka chuan thusawiin, sawrkara an thilngiat nawr nan kumin April ni 15 atanga ni 17 chhungin pen down strike an lo nei tawh a, DP&AR Minister in theihtawp chhuaha bawhzui a tiam avangin April ni 19 ah sawrkar nen inremna an siam a, May ni 19-a representation an thehluh chu August thla tawp lama an ngaihvenin, an lehkha thehluh a bo thu an dawng a, an chhui zelnaah file engmah a kal lo tih an hmuchhuak a ti a, inremna an siam hnuah sawrkarin a ngaihtuah ve mai dawn emaw an tih laia a ngaithah chu hreawm an tih thu sawiin, September ni 3-a general body thukhawm chuan nawrh huaihawt an rel a ni a ti. 

AMCECC hian Mizoram sawrkar laka an thil phut hrang hrang chungchangah thu lawmawm hriat tur a awm loh avangin lungawi lohna lantir nan tun thla September ni 9 atanga ni 11 thleng khan Mass Casual Leave an lo la tawh a ni.