Bollywood film ngainatute tan chuan hei lo liama en chakawm hi a awm thei dawn em ni tih mai tur a ni - 'Tiger 3' ah Shah Rukh Khan leh Salman Khan te an changdun dawn. Hei mai a la ni lo Katrina Kaif a la awm cheu bawk - nakkum April-ah tlangzarh a ni ang. 

Tiger (franchise) hi Bollywood industry-ah a hit hle a, a pathumna tur an siam leh dawn. Indian film director hriat hlawh Maneesh Sharma kaihhruaina hnuaiah thla thar atangin shooting an tan dawn a, thawm an nei ring nghal hle. 'Tiger Zinda Hai' kha 2017 khan tihchhuah a ni a, Salman Khan leh Katrina Kaif te an changdun a nih kha. An budget pawh vaibelchhe 210 lai a ni a, Box Office atanga a sum lakluh chu vbch 565 a ni. Tiger 3-ah hian Rukh Khan a inlan tel dawn avangin a hma aiin ngaihven a hlawh zual ngeiin a rinawm.