Kum 13 mi chauh a ni chungin football lamah chhun tur a neih that em vangin Benjamin Aguero-a'n professional game luhchilh tura Argentine club Tigre tana training a nei chuan ngaihven a hlawh nghal hle.
   

 Benjamin Aguero hi football legend Maradona fanu fa niin a pa chu Manchester City striker hlui Sergio Aguero a ni. Thlahtute hi a chhun fuh a nih ngat chuan football thiam tur a rinkai a ni. A pa Aguero senior hian lung lam harsanna vangin tun season khan a ballboot a khai ve tawh a ni. 
   

Sergio Aguero chuan a fapa-in Tigre lama training session a zawm chungchang sawiin, "A thian kawm ngeih ber football zirna hmun a nih vangin Benjamin hi Tigre lamah hian kan dah a ni. Kar hmasa khan lut turin a va bei ve a, an lo thlang ve hlauh a, amah pawh a lawm khawp mai. Amah nen pawh ka in bia a, ka lawmpui thu leh hlawhtling tur chuan theih tawp chhuaha beih a ngaih thu ka hrilh. Nikhatah tum hnih an practice a, nuam a ti hlein ka hri. A tui chho zel dawn em tih erawh a hriat rih mai lo," a ti. 
   

Aguero chuan football khel tura nawr luih an tum hran loh thu leh a duh a nih phawt chuan kawng dang daih a zawh an remtih sak thu a sawi lang bawk.