Tunhma chuan tlangmi zingah Mizote hi All India Service leh Central service ah kan lut tam ber niin an sawi thin a, tunah erawh chuan All India Service ang chi IAS, IFS leh a dang te ah Mizo an lang ngai ta meuh lo. A lang chhun pawh kan thenawm state a Zo hnahthlak kan unaute an ni a, engtin nge tan kan lak thar ang tih beng sika ngaihtuah a, mutmawh hnar mawha neih a hun ta hle mai.

All India service hrang hranga tam zawk kan luh theihnan sawrkar chuan theihtawpin tan a la a. Mizoram Youth Commission chuan sawrkar term hmasa tangin All India service leh thildanga inziaktling te chu tanpuina 'incentive cash award' pawh a lo tawktarh tawh thin a. Mahse vawiin thlengin hlawhtling kan la awm lo a. Mizo zinga IAS tling kan neih hnuhnung ber chu kum 2014 a ni ta hial mai, engtin nge tan kan lak zel ang le?

Central service a Mizo kan lut tlem lutuk hi zirlai pawl ten an vei a, theihtawpin tan an la a. Kohhran meuh pawhin veiin Mizoram Kohhran zinga lian ber Presbyterian Kohhran chuan an hmalakna tur zingah an telh bawk a. Chumai ni lovin Mizorama tlawmngai pawl lian ber Young Mizo Association (YMA) pawhin 'Zirna uar' kum hial puangin nasa taka tan lak a tum bawk a ni.

All India/Central service ah hian engvanga lut tlem ta nge kan nih a, kan hranghlui te ai khan kan thiam ta lo zawk em ni tih zawhna awm thei a ni a. Tunhma aiin hmanrua a tha a, thangthar te pawh an thiam zawk a ni. Kan mamawh ber nia lang chu 'tih tak zetna kan tlanchham' niin a lang. Tumruhna nen kan zir phawt chuan kan thalaite hian hnamdang te hi an elpha a ni tih an hriat a, tan an lak thar a pawimawh hle. Kan ram tana sawrkar, kohhran leh tlawmngai pawl te an harhchhuak ta hi thil lawmawm tak a ni a, pheikhai rual taka hma an lak phawt chuan rah tha a chhuah ngei a beiseiawm e. Tun ang renga kan kal chuan Mizorama sawrkar hna lian leh pawimawh zawng zawng hi hnamdangin an la chelh ang a, chutih hunah chuan kan ram himna thlengin a derthawng thei hial ang.