Kan hma lawk May 5, 2022 hian Mizoram Autonomous District Council zinga mi, Mara Autonomous District Council-a MDC thlanna neih a ni dawn a. He inthlanah hian chak ngei tumin party hrang hrangten theihtawp an chhuah mek a, tunlai tak hian campaign pawhin a vawrtawp a thleng mek a ni.

Democracy ramah chuan eng inthlanna pawh hi a pawimawh vek a, a te lua leh lian lua awm lovin chak ngei tumin party hrang hrang te chuan theihtawp an chhuah mek a ni. Central-a roreltu BJP pawhin hmun kilkhawr leh an tana pawimawh pawh ni phak awm lo hiala ngaih hmunah theihtawp chhuahin sawrkarna chan ngei an tum a. State-a BJP hruaitute mai bakah union minister leh party hruaitu lawk tak takte pawh an lo kal hial a ni.

Chutiang zelin state-a rorelna chelh mektu, MNF pawh chief minister hovin minister leh party hruaitu lianten awmchilhin theihtawp an chhuah mek a. Congress leh ZPM lam pawh sawrkarna siam tumin tan an la nasa hle bawk. Engpawh nise, tunge sawrkar ang tih chu MADC huam chhunga mipuite thu thu a ni a, hun reilo teah a hriat mai dawn a ni.

Hun kal tawha political party hrang hrangten an tih fuh loh thin chu an tan luatah an tih theih loh tur tiam thin hi a ni. Election campaign lai hian party tin te hi an tang em em vek a, campaigner thenkhat chuan an tan luatah thil tih hlawhtlin theih loh tur tiam mai an ching thin a, hei hi a pawiin anmahni vawlettu a ni thin a; chuvangin, fimkhur a ngai hle. Mizoramah pawh hun kal tawh ngaihtuahin inthlan hmaa an thilsawi hi a hnua vawlet leh tu a ni fo thin a, fimkhur a ngai hle.

Mizoram Autonomous District Council inthlan neih mai turah pawh hian party hrang hrangte hian Election model code of conduct zah tak chunga an campaign a tha a. Chumai bakah inthlanna dik leh fel fai a awm theih nana hma latu Mizoram People’s Forum (MPF) thu leh hla zahthiam a pawimawh bawk. Inthlannaah hian tlin ngei tumin party hrang hrang te hian theihtawp an chhuah ngei tur a ni a, chutih rual erawh chuan tlin loh hlauh luat avanga tihhlawhtlin theih loh tiam erawh an tih loh hram a fuh ang.