Social media platform TikTok-ah lal thar a piang a, a hming chu Khaby Lame a ni! Kum 22 mi Senegalese hian American nula Charli D'Amelio chu rawn khumin TikTok-a follower ngah ber an rawn ni ta - follower maktaduai 143.5 zet a nei. 

Khaby Lame hian Ningani khan 142.5 million follower a rawn nei tling a, heti hian North American influencer Charli D'Amelio follower neih zat 142.2 million chu a rawn khum ta a ni. Chutih rual chuan follower an neih zat hi danglam ve reng a ni tih erawh hriat tel a tha - tuna an follower neih zat kan tarlan pawh hi a danglam leh tawhin a rinawm.  

Khaby Lame hi Senegal-a piang niin, Chivasso, Italy-ah a seilian thung. A hming tak hi Khabane Lame niin March 2020 khan a hna a chan hnuah TikTok hi a luhchilh tan a, @khaby.lame tiin a indah. Rin phak bakin a hlawhtling zui a, hun reilote chhungin milarah a insiam der. 

A TikTok career hi a hlawhtling hle a, Hugo Boss chuan sponsorship lian tham tak an ziahpui nghe nghe. Khaby Lame hian TikTok-ah hian viewer maktaduai 300 chuang zet a nei a, sponsorship lian tham a hmu pawh hi thil mak a ni lo. 

Hman lutuk vang?
Khaby Lame hian kum 2020 khan Turin, Northern Italy-a factory pakhatah machine operator hna a thawk a, mahse vanduai thlak takin Covid-19 avanga hnathawktu an ban zingah a tel hlauh. Hna a neih tak loh avang leh lockdown avanga tih tur hre loa a awm lai chuan TikTok video siam chu a ching chho ta a ni. Khaby Lame chuan, "Lockdown a ni a, tih tur reng ka hre lo. Mahse ni khat chu TikTok video ka siam a, ka tuipui chho ta a ni," tiin Forbes a hrilh. 

"Heng video te hi a darh zel tih ka hmuh avangin ngaihtuahna ka siam a, a awlsamdan tur ka ngaihtuah. Mi a tam thei ang ber hnen a thlen theih dan tur ka ngaihtuah a, a tha ber chu thusawi loh hi a ni," tiin tawng loa chetziaa a lan tir thin chhan nikum khan CNN a lo hrilh tawh bawk. 

Tunah chuan a thlen chin khawvelin a hria a, tunge a nih inhrilh nawn a ngai tawh lo - hna nei lo tih tur hre lo kha tunah chuan a talent ropui tak avangin influencer lar ber zinga mi a ni ta. 

Charli D'Amelio
Kum 18 mi lek ni mahse a hlawhtlinna chan hi a namai lo hle. American social media personality leh dancer ni bawk American social media personality hian huhang a ngah hle a, 2019 atang khan social media career a tan chauh nghe nghe. Heti chung hian a lar chak em em a, video-sharing platform TikTok-ah phei chuan follower ngah ber nihna hun eng emaw chen a chelh a ni. 

TikTok-a follower ngah zual top 10 
1. Khabane Lame - 143.5 million 
2. Charli D'Amelio - 142.3 million     
3. Bella Poarch - 90.1 million     
4. Addison Rae - 87.9 million 
5. Will Smith - 72 million 
6. Zach King - 68.7 million 
7. Kimberly Loaiza - 63.6 million 
8. TikTok - 62.9 million 
9. Burak Özdemir - 59 million 
10. Dixie D'Amelio - 57.4 million