Kumin zet chu Taylor Swift tan kum tha bik leh hriat reng tawh tur ava ni chiang em - TIME magazine chuan Person of the Year 2023 atan an thlang leh ta! American singer hi tun hnai khan Apple Music Artist of The Year 2023 atan thlan a lo ni tawh bawk a, hlawhtlinna a chang chho mawlh mawlh a ni ber. 

Kum 33 mi Taylor Swift hian kuminah 'Eras' tour a nei a, hei hian rimawi khawvelah hlawhtlinna tam tak a pek belh a tih theih awm e. Record hrang hrang thahnem tak a siam a, chawimawinain a umzui reng emaw tih tur khawpin a hlawhtling. TIME magazine Person of the Year atana thlan a nih chungchangah hian Taylor Swift chuan, "Ka inchhuan ber leh ka hlim ber tum ka tawng hialin ka hria," tiin a sawi a, a lawm tak zet tih hai rual a ni lo. 

He chawimawina hi a hlu hle a, khawvel huap a nih miau avangin Taylor Swift lawmna pawh hi a hriat thiampui awm hle. Time Magazine ten Person of the Year 2023 atana thlan theih an chhawp chhuahte hi an hrawl hlawm hle a, China President Xi Jinping leh Russia President Vladimir Putin te an ni nawk. Anni bakah hian Hollywood actor leh writer tha ber berte an lang a, rimawi lama hming tha em em Taylor Swift hian a dawng ta a ni. 

'Back to December' singer hian buai hle mah se 'chhas' lam erawh a hlam chhiah bik hauh lo a, hun rei tak chhung a kawppui lo ni tawh British actor Joe Alwyn a thlah fel chauh a, American Football star Travis Kelce nen an inkawp leh ngha chat a ni. Kum 34 mi Travis Kelce hian Taylor hi tour a neih lai pawhin a tawiawm zauh zauh a, kumin September thla khan a vawi khat nan hmuh dun an ni. 

Taylor Swift hlawhtlinna thenkhat te : 

* Kum 2023 chhunga tour ticket hralh hnem ber 

* Eras tour film chu concert movie awm tawh zinga global box office-a sum lalut hnem ber ($mtd 249) a ni. 

* Artist zinga US Top chart-a album 5 top 10-a lanpui vek thei awm chhun a ni. 

* US bikah hmeichhe artist zinga No. 1 kai thei album nei hnem ber (13) a ni. 

* Hla phuahtu zinga Grammy award-a song of the year nominantion hmu hnem ber (7) a ni - Sir Paul McCartney leh Lionel Richie te a khum. 

* Wembley Stadium-a concert ticket hralh zo vek thei record ding lai chelhtu Take That te a nih rual. 

* Hmeichhe artist zinga Spotify leh Apple Music-a stream nasat ber record a siam.