Aizawl khawpuiah Traffic jam vangin thiltih a harsa a, meeting leh thil pawimawh tih dawn pawhin hun ruahman thiam a harsa thin. A hun taka thleng tur chuan a hma lama inpuahchah lawk a ngai a, hma takah meeting turin chhuak ila, traffic a jam loh chuan kan thleng hma lutuk a, a hun niawma kan hriatah chhuak ta ila traffic jam kan nan fuh erawh chuan kan tlai leh lawi si. Ni tinin lirthei a pung tual tual a, kawng lah chu zauh a harsa em em a. Zauh a hnekin kan nepchep tial tial emaw tih mai tur a ni bawk si nen rikrum thil leh damlohna thilah pawh chetvel a harsa ta hle. Hetiang hi Aizawl khawpui Taffic dinhmun a nih avangin Mizoram State Transport Authority chuan mipuite samkhai zawknan nikum 2016 kumtawp lam khan Aizawl khawpui ah Two Wheeler taxi leh Aizawl khawdai vela service turin Auto Rickshaw te permit pek nise tiin a rel a. Hei hi mipui pawhin an tangkaipui hle niin a lang. Transport department thawktute chuan Aizawl khawpui a service tur hian two wheeler permit 221 an pechhuak tawh a. Heng zingah hian service tura register fel tawh chu 24 an awm niin Zalen an hrilh. Two wheeler taxi khalhtu pakhat chuan Office kai leh school naupang hruainan an hmang nasa hle niin Zalen a hrilh a. Anni ho bakah hian sumdawng thenkhat pawhin an hmang thin niin a sawi a, zingkar pisa kai hun leh naupang hruai hun vel, zing dar 7:30 atanga 9:30 inkar chu a buai hun lai ber niin a sawi. Two wheeler taxi chu a hlawk nia sawiin ni khatah Rs. 1000 chuangte a hlawh thei niin a sawi a. “A chhe berah Rs. 700 tal chu ka hlawh thin a, petrol hi a tam berah Rs. 200 man te ka thun a. Ka tlan chhiat deuh leh petrol kan hmang tlem ve mai a, a tihchi khawpin ka hria,” tiin Zalen a hrilh bawk. Dawr te siam thin nu pakhat chuan a dawr bungruate la turin two wheeler taxi te chu a hmang thin tih a sawi bawk a. “Traffic jam a nasat thin avangin Taxi ah chuan rei tak tak hun hman chang kan nei a, two wheeler-ah erawh chuan kan put zung zung theih thin avangin a tihchi hlein ka hria,” a ti. Amah a kal kher loh pawhin two wheeler taxi khalhtute chu dawr bungrua la ten a tir mai thin a, mahin dawr a lo nghah theih thin avangin a tih chi hle niin a sawi bawk. Two wheeler taxi hi STA rate bithliah dan chuan tlanchhuah tirh km khat ah Rs. 10 a niin a bakah chuan km khat zelah Rs. 5 tur a ni a. Mahse, STA rate siam hi two wheeler taxi zingah zawmlo an awm a, hemi chungchangah hian STA hotute chuan an zawm ngei ngei tur ani tih Zalen an hrilh a. “Rate zawm lo an awm chuan rawn report sela, a tul angin action kan la zel ang,” an ti.