A hmel han en mai pawhin High sikul a rap lo tih a chiang a, a hmaia zia inrin te chuan thlan tlaa hnathawk \hang a nih zia a pholangin ka zuk hre hial a. Tun dinhmun thleng tur hian a bei nasa hle tih hai rual a ni lo; hrehawmna-in amahah nghawng a nei thei tawh lo tih a inhmeh khawp ang. Kum 20 chuang Mizoramah a awm tawh a, a ‘aw’ phawi chuan min bum hman thelh a. Consonant lam rik thiam loh ‘an’ neih \hin pawh a reh titih tawh a; uluk taka beng dawh chauhin tlem azawng a chambang tih a hriat. Khaw chhak atanga lo tla thla a ni tih awlsam tea hriat hranna tur amahah a awm tlem tawh hle. A hming erawh ‘common’ tak, ‘Chingi’ a ni. Electric leh tui bill la khawmin hun neilote an bill a peksak thin a, connection 1 zelah tha hah man a la ve a. Bill leh pawisa a rawn lama thla tharah bill thar lam pahin receipt a kir leh mai thin a. Hemi atanga hian thlatin cheng 3,000 a hlawh pha daih a, in za aia tam a luh chhuah \hin a lo ni a. ‘Ka puin bill pawh vawi tam ka pe tawh alawm, vawi 2 chiah ka la hmu che,' tiin ring deuhin a nui hak a. A ni lah tak reng a, sum bo thlau a awm ngai lo a, a rin ngam em a, rilrua helhkam neuh neuh a lo la kiang ve hrim hrim a, thinthiin amah dawrtute a siam theihna chu suma lei theih a ni ngawt bik lo. ‘Kum 3 chhung chu Aizawl chhim lamah mi in pakhat ah awmpui angin ka awma, chumi hnu chuan hna dang te ka zawnga, thawh theih leh thawh thiam tawk te zawngin ni tin chhuakin a rem rem ka thawk mai thin a. Kum 2 hnuah motor khalh thin driver an tih ang hi pasal ah ka nei a, tunah mi inhnuai luah in fapa 2 neiin kan awm,’ tiin a chanchin zawhna chu a chhang a. ‘Kum 1 dawn ka pasal chu a chawl tawh a, accident ah a malpui a tliak a, tun thla (July) ah khian khalh zawm a tum a, keimah ka hah hrih deuh a; mahse, chhungkuaah chuan chu chu tihdan a ni sia tiraw, ka pu? tiin a sam chu a \awn \ha mawlh mawlh a. ‘Aw’ tia chhang ta lo chuan thlunglu-ah zawhna dang a lo lut zut zut a. Zing lam chu fapa 2 pawl 9 leh 10 zirlai tukthuan te buaipuiin chumi zawhah chawhma dar 10 atangin SSA sikul pakhatah chawchhumin a inhlawh leh a, naupangin chaw an fak zawhah (midday meal) mi In ah inhlawh turin a kal leh ta thin a ni. “Dar 12 hnu lam ka awl tih miin an hria a, min hre thangte chuan min phone mai a, inchhung tihfai, insuk leh a tul dangte min tihtir a, tunah tak phei chuan ka zo lo lam lek lek a ni a, n tinin in ngaiah ka kal thei bik lo a, vawi khat kal hian Rs 200 te kan hlawh ve a, chhungkaw tam tak chuan nitina inchhung tihfai leh insuk ‘tha man’ an zo bik loa kar khatah vawi 2 te kalin min dawrtute chu a chhawkin ka pan mai thin,” a ti awlsam et a. Tlai dar 4 a rik hnaih tawh chuan inlamah ei rawngbawl turin a haw a, a chang chuan a fate 2 chuan lehkha zir pahin an chhawk ve thin tih a sawi bawk a ni. Lehkha zir a ngaih loh tum chawlh leh Inrinni chuan a fate hian a nu chu an zui thin a, an thawh tawk ang pawh hun awl a zirin an nei ve reng thei tlat. Chhungkaw ‘background’ pangngaia piang mi tam tak Zawlkhawpui-ah hian an awm a, chungte’n mi an pha lo ang tih hlauvin an thiam ang tawkin an dawm kanga,hna zawn chu sawi loh hnathawh tumna nei thlawt lo generation chuan kum 20 vel kalta a\angin sel an hlawh tawh a. Mu tlawn zuara sap tlangval inkhel en nileng peih; zial man to chi ni lo chu chuapin a mil theih miah loh; thluak hman hlau ngawih ngawih, an thawh tawk anga chhawr dawna typing a ngaihna hre miah lo; remote control erawh blind a type thei 'thatchhe' hri in a man te kha tunah hian eng tak ang maw? Heng rualho hnua piang ‘Generation Y’ zingah chawmhlawm speed a tlan hmuh tur an la tam viau a; hnathawh lamah an tlan chak ve tho ang em? tih te hi beng sika ngaihtuah nawn a hun leh tawh lo maw? Mahni thawh tawk ang thawh pawisa lo, private firm-a inham tang leh zan hnathawk \halai thanem tak awn awm tho a, an hna zo thim hlim vela an kal hlawk hlawk hmuh tur an tam ta, hmasawnna a lang \an. Heti chung hian ‘Hna a vang tawh’ tih hi tawngkam lar takah a chhuak ta ringawta, ‘hna vang branded rilrua n­a’ an tei suau suau ve bawk a. Thingtlang atanga retheihnain khawpuia a lo um luh; retheihnain a tih fei leh fin tawh te- Chingi ang te khian chhungkua an chawm leh lawi si a. Chingi hian ziak leh chhiar a thiam tawng tawnga, mahse mahni inchawma thingtlang atanga lehkha zir hrehawm pawisa lote hian tun Sawrkar kalphung ‘outsourcing’ uar tumna ramah hian an Everest an lawn tan a, a chhip an thlen hunah chuan Khawpui tlangval inti thenkhat hi chuan tlang bul thut atangin an thlir chho lo vang tih tunge sawi thei?