Mihring kan changkang chho zel a, tun hma lama hah tak taka lo lama hnathawh a awm tawh lo va. Taksa a hahdam chu thuhran nise, ei leh in chungchangah pawh ei tur tha leh changkang hmuh tur a tam a, mihringte pawh hrisel zawk tura ngaih mai a awl hle. Mahse, heng kan hahdamna leh kan ei leh inte hi mihringte damkhua titawitu an ni ta zawk. Tun hnai kum eng emaw kalta atang khan Mizoramah lungphuchawla thi, thih thutna (stroke) leh BP sang te chu a lar hle a. Heng natna inkaichhawn theih lohte hi mi dangte atanga kan kaichhawn ni lovin kan nun dan dik lo avanga awm a ni. A bikin Aizawlah phei chuan sa leh thau (thil kan etc.) kan ei hnem a, daihlim hnuaiah hna kan thawh bakah kan hnathawhna hmun pan tur pawhin lirthei kan hmang leh zel a, khawsak nuam ta lutuk hian harsatna a thlen ta zawk niin a lang. Lungphuchawla thi, stroke leh BP sang te hi tun hma lam aia chuan an tam ngei tih Dr. John Zohmingthanga chuan Zalen a hrilh a, a tam chhan ber chu ‘awm awl, ei tur tui, stress, nundan inthlak leh zu’ a ni ber tih a sawi. Dr. John-a chuan kan hnathawh dan a nuamin thlan tla hnathawh a tlem a, thau leh thlum kan ei nasat bawk avang te in hetiang natna hi a hluar ta niin a sawi a. “Pathianin mihringte a siam danah ramhnuaiah te kala hnathawk turin a duang a, hetianga kan awm loh avangin harsatna tawk hi kan tam ta niin a lang,” a ti. Mizoram atanga damlo phai pan (refer) case-ah pawh thingtlang lam ai chuan Aizawl chu an sang filawr hle niin a sawi bawk. Health Department (HME) hnuaia Non Communicable Disease lama mawhphurtu Dr. Eric Zomawia pawhin statistics mumal tak awm chiah lo mah se stroke leh BP sang natna chu Mizoramah a sang chho hle tih Zalen a hrilh bawk a. Hetiang harsatna a awm chhan ber chu awm awl (exercise lak tlem), ei leh in tha (thau leh thlum ei tam) leh zuk leh hmuam tih nasat vang a ni tih sawiin hengah te hian tan kan lak chuan a ziaawm thei dawn niin a sawi bawk. Aizawl a cheng pa pakhat Chhuana chuan BP sang neih a hlauh avangin invenlawk nan a theih tawpin tan a la tih a sawi a. "Ei leh in ka insum bakah tuktin deuhthawh insawizawi hian ke in ka kal thin a, hei hi ka thatpui hle in ka hria,” tiin Zalen a hrilh bawk. Tunlaia BP sang leh stroke thlentu pakhat chu zu niin mithiamte chuan an sawi a. Zu hian BP sang a thlen theih hrim hrim bakah zu in mite hian chi (al) te, sa bakah zuk leh hmuam dang an tih nasat thin avangin an tuar hma bik nia thudawn a ni. Statistics atanga a lan danin stroke hi India rama thihna langsar zinga mi a ni a. Mi 10,000 zela 119-145 inkar chu stroke nei anga chhut a niin thingtlang aiin khawpuiah a hluar zawk a ni.