Damdawi zuar nu pakhat chu doctor ten damdawi an chawhna an ziak chhe thin lutuk chu ninawm a tih thu sawiin a ang bawrh bawrh a, damdawi lei tum nu berh ve tak hnenah chuan, “Damdawi in pek sual a hlauhawm, doctor i rawn chu han ziak that tir rawh,” tiih a lo hrilh mawlh mawlh a. Zalen thudawn danin doctor kutziak chhe lutuk chhiar hleih theih loh avangin damdawi zuar thenkhat chuan pek sual an hlauh avangin dam dawi chawhna lehkha chu ziah that tir turin damlote an hrilh fo thin a, then khat phei chuan an dam dawi zawrh lai ngei te pawh ziak a chian loh em avangin damlo hnenah tih sual hlauh vangin an hralh lo fo thin a ni. Maubawk nu pakhat chuan doctor kutziak chhia avanga buaina a tawh thin hetiang hian zalen a hrilh. “Damdawi min chawh thenkhat chu damdawi zuar ten an chhiar theih loh avangin an neih loh thu in min chhan phah thin a ni,” a ti a. Doctor an ziah that tir hnuah an zawhna ngai damdawi dawr ah bawk an lei leh thin thu sawiin, ziak chhiar theih loh avangin damdawi an zawn chu nei lo anga an chhan mai thin thu Zalen a hrilh. Zalen thudawn danin doctor kutziak chhia chhiar hleih theih loh avangin damlo ten doctor chawh ni lo damdawi an lei zauh zauh thin a. Heti hi ni mahse Mizoram-ah chuan damdawi lei sual avanga thi emaw harsatna lian tham tawk an awm lo nia thu dawn a ni. Dr. John Zohmingthanga, Medical Council of India-a member ni lai chuan, Doctor te'n damlo damdawi an chawh in generic hming anga ziah theih nise a duh thu sawiin, Medical Council of India pawn doctor te chu damlo leh damdawi zuar ten an chhiar theih ngei tura fiah fai taka ziak thin tura a ngen thu a sawi a."Kutziak chhiat avang hian doctor hi hrem theih ni lo mahse damlo ten an tawrh theih avangin hawrrawppui emaw a ziah theih nise a tha ngawt ang," a ti. Dr.John-a chuan doctor rual inhmuhkhawmna ah pawh hemi chungchang hi sawi chhuah thin anih thu sawiin, hawrrawpuia an ziah loh pawn tute tan pawha chhiar theih a ziak turin doctor te chu beisei an nih thu a sawi bawk. Dcotor pakhat chuan kutziak chhiat avanga buaina chu tun hma lamah a tam zawk thu Zalen hrilh in, "Tun hnu hi chuan doctor naupang zawk te hi an kutziak a nalh tlangpui tawh a, tun hma khan doctor 5 vel chu kutziak chhe zual tiin sawisel an hlawh thin hle a ni," a ti a. "A chang chuan kan thawhpuite kutziak chhiar theih loh chang kan nei thin a, keimahni kutziak ngei pawh kan chhiar thei tawh lo thin," tiin a sawi. Doctor te kutziak chhiat avang hian Union Health Minister JP Nadda-a chuan tunhnai khan Doctor-in damlote hnena damdawi an chawhna lehkha ah hawrawppuia ziak turin rawtna a lo thlen tawh nghe nghe a ni. Thudawn danin Ministry of Health & Family Welfare, Government of India chuan doctor kutziak chhia avanga buaina chungchang hi a ngaipawimawh hle a, thudawn danin hawrawppuia doctor damdawi chawhna lehkhaa ziah tur chungchangah Union Health Ministry chuan hriattirna tihchhuah thuai a tum a, tihchhuah a nih chuan doctor te'n damdawi chawhna lehkha an ziahah hawrrawpui vekin dam dawi hming leh natna hmingte an ziah a ngai tawh dawn a ni. Doctor kutziak chhiat lutuk avanga buaina hi thil thar a ni lo a, khawvel hmun dangah pawh an lo buaipui tawh thin a ni. Doctor kutziak chhia avanga damdawi eisuala thih phah te pawh an awm a, US-ah chuan kum khatah damlo 5,000 chu damlote natna vang ni lo, “non-medical reasons” vangin an thi a, India ramah hetianga thi zat hi hriat theih loh mah se, tam tak an awm rin a ni.