Sawrkar hna chu thawk chak viau thin mahse pawl 5 pawh zir chhuak lo leh tihpuitu nei ve lo an nih miau avangin lo neih chu ei an zawn ve theihna remchang awm chhun a ni a. Chhungkaw rual tan buh ei khawp hmuh mai a tawk lo, sum chang thlai an chin tel a ngai. Fu huan an siam hma chuan thlai hnah tlem a zawng thar chhuakin an nung ve tawk tawk a, tunah zawng Fu huan siamin kum khatah cheng nuai 1 aia tam sum an la lut tawh thin. Fu huan neih chu eizawnna pui bera hmang an awm chho nual tawh a, Phulpui khaw mi Zairema chu fu huan neia eizawn nana hmangte zinga mi niin kum khat chhungin fu huan hmangin cheng nuai khat chuang sum an la lut thin a. Fu chu kurtai siam nan an hman ber bakah fu tui zuar hnenah fu tlawn an hralh thin bawk a. Aizawl khawpui chhungah fu tlawn an hralh bakah District dangah pawh an hralh chhuah thin thu Zairema chuan Zalen palai a hrilh. Phulpui khua ah hian Fu huan nei chhungkaw 130 bawr vel an awm niin Zairema, Phulpui fu huan nei Association Treasurer chuan Zalen palai hrilh in, tun hnai kum 3 kalta vel atang khan fu huan siam an pun thu sawiin NLUP Trade-ah thlan theih a duan chhuah anih vang a ni a ti. Fu huan siama eizawng an awm lai hian fu tui zuara eizawng tam tak an awm nual a. Kum 1992 atanga tun thlenga Tennis Court bula fu tui zuar chuan an eizawnna chu hna tlawm zawk ni mahse chhungkaw chawmna tlak a nih thu Zalen palai hrilhin, 'hna ropui a ni lo mahse midang kan awt lutuk bik lo, chhungkaw chawm nan leh kan mamawh chu kan dawr hmang hian kan lei thei a ni,' a ti a. Hah taka thawh ngai ni mahse hlawk ve tak a nih thu an sawi. Aizawl khawpui chhungah hian fu tui zuar an awm nual a, dawrte nei an awm rualin thenkhat chu kawng remchanga in bun te pawh awmin ketli te hmanga khai kuala zuarte pawh an awm nual a. Fu tui zuar Zalen palai in a kawm kualte chuan eizawnna tlak a nih thu an sawi vek hlawm a. Khawlaia khai kual thin Khuma chuan khawl a neih ve loh avangin fu herna khawl nei hnen atangin fu tui chu a khar chhawn thu sawiin khar chhawng ni mahse chhungkaw chawmna tham chu nitin sum a lakluh thin thu a sawi.