Fahrah naupang dah khawmna hmunah engtik atangin nge a awm tih zawhna chu chhan ngaihna a hre lo a, a hriat chhun chu a nu leh pa tak tak an boral tawh a ni tih a ni mai a. Chhia leh tha a hriat mumal hnuah HIV positive a nih tih hrilh hriat a ni a, chumi avang chuan a lungngai teh chiam chuang lo a. Zirna ina an hotuten a len huna a nih tum an zawh pawh Sipai Lal nih a tum thuin a chhang mai thin a. Mihring ngaiha thih mai hmabak natna hrik a pai chu lungkham nachang hre lo khawpin naupang rilru thianghlim a la ni si. Mipa naupang harh vang tak mai Fahrah naupang dahkhawmna hmuna awm mek chuan Mizoramah a rualpui HIV engzat nge awm tih a hre lo a. HIV natna hrikin taksa-ah nghawng a neih dan pawh an hotute sawi thenkhat bak a hre lem lo, a hriat chhun pawh a theihnghilh nghal zel thin a ni. Mizoramah hian MSACS lam chhinchhiah danin kumin January thla thleng khan kum 14 hnuai lam HIV positive 661 an awm a, a kum telin an pung emaw tih tur a ni a. Kum liamta 2015 khan naupang 10 in HIV hrik hi an pai thar niin chhinchhiah a ni. Nau pai HIV hrik hmuh chhuah an tam tual tual emaw tih tur a ni a, Civil Hospital-a awm PPTCTC-ah nikum chhung khan counselling pan mi 3759 awm ah mi 59 an Positive a. PPTCTC-a thawk tute chuan pun lam an pan thu an sawi rualin a kum a zirin a danglam thin thu an sawi a. Kum tin deuhthaw July thlah Nau pai HIV positive hmuh chhuah thar an tam thin thu Zalen palai an hrilh. An nupui te positive an nih avang hian thenkhat chuan an then phah rualin thenkhat erawh chuan an nupui te hrik pai hi an pawmpui thlap thung a. An pasal te ai mahin an pasala chhung ten an thinhrik thin thu MSACS-a thawktute chuan Zalen palai an hrilh a. Zawhna chhangin positive avanga fate fahrah dahna hmuna dah an tawn tam loh thu sawiin nupa tuak pangngai atang ai mahin nupa kar loa fa pai ten an positive an hriat avangin an fate an thlahthlam zawk thin thu an sawi. An hma hun a thimzia hre pha lo naupang khawngaihthlak tak tak Mizo naupang HIV Positive an awm mek a, thenkhat duat taka enkawltu chhungkua an neih laiin enkawltu nei mumal lo HIV Positive dah khawmna hmun leh Children Home thenkhata awm an awm nual a. HIV positive te ei ngei tur damdawi ART lakna chang hre lo tam tak an awm rualin chhinchiah theih chinah naupang HIV positive 661 awmah ART la 233 awmin la lo 378 lai an awm bawk a ni.