Ei khawp hmu tur chuan thawhrim a ngai thung a ni. Sorkar hnathawk leh kamding ngawt lo pawn chhung kua hrawk chawmin khawsak pangngai tak a nih theih. Sihphir ti sihphir tu chu Iskut hi a ni a, Iskut kan sawi chuan sihphir rilru-ah a rawn lang vat thin a nih hi. Sihphir-ah hian Iskut chinga ei bel bera hmanga chhungkua engemawzat an awm a chungte chuan kum khat chhungin Nuai 2 chuang te sum an la lut thin a, huan nei zau Iskut thar tam te phei chuan Nuai 5 chuangsum an la lut thei. Kum 1992 kum atanga Iskut huan nei tan Rinzuala chuan Iskut chu an sum hnar lian ber a nih thu Zalen palai a hrilh a, sum lak luhna peng dangte chu nei ve bawk thin mahse Iskut atanga sum an lak luh chu chhungkaw chawm nana an hman ber a nih thu a sawi a. Kum khat chhunga an sum lakluh erawh tlak hniam changa neih thin thu sawiin, huan enkawl chungchangah erawh chhungkaw tanrual a ngaih thu a sawi. Rinzuala sawi zel danin sorkar lam atangin tanpuina an dawn thu Zalen hrilhin,'sum fai erawh chuan kan dawng ngai lo lei tha leh kan thlai chinna kawnga kan mamawh tur angte min pe thin' a ti. Iskut chingtute hian harsatna an tawh fo thin chu a hralhna kawngaha a ni a, mizoram hmung hrang hrangah an thawn chhuaha Aizawl khawpui chhung bazara an zawrh bakah an hralhna lian ber chu Silchar-ah a ni a, silchar atanga Iskut lei saktute hian rate mumal an neih loh avangin Iskut an thar chhuah dan in ang rengah pawh kum tina an sum lakluh a danglam thin a ni. Air Condition hnuaia nuamsa taka awma PHE tui connection avanga tui harsat zia kan hriat loh lai hian Iskut chingtute erawh khawkheng ruahtui tla tlem te hian a ti buai thin hle a, kum 2015 chhung pawh khan khaw kheng leh ruahtui tlak tlem avangin Sihphir-a Iskut chingtute chuan Iskut an thar tlem phah a ni. Zalen palai zawhna chhangin Mizoram Iskut Grower Association (MIGA) hnuaia Sihphir Neihbawih branch President Rinzuala chuan Iskut rate-ah association member te an in lungrual tlan thu a sawi a. Association in rate mumal a neih theih nan rate an control thin thu sawiin, tun hnuah erawh mimal duhdan anga an kalpui tawh thu zalen palai a hrilhin a rate erawh a in an tlan thu a sawi. Mizoram Iskut Grower Association hnuaiah hian Branch engemawzat awmin member hi mi 850 chuang an awm mek a, Sihphir bikah hian Iskut hmanga eizawng hi chhungkaw 400 chuang an awm mek bawk a ni. Iskut chingtute hian eizawnnan an hmang tlangpui hlawm a, eizawnna dang neia Iskut huan nei kawp erawh an awm mang lo thung a ni.