DOWNLOAD OUR APP

Read latest news on your phone
app-store

Tinreng (feature) : Kolkata taxi driver in phone bo min kir

Oct 16, 2016

Tinreng (feature) : Kolkata taxi driver in phone bo min kir

Kolkata khawpuiah Bengali taxi driver in mobile phone theihnghilh min rawn kir thlap? Thu tak a ni a. Ni e, a mak ngawt mai. A va rinawm awm ve? Ni e, a rinawm.Viltu an awm zawk a ni lo maw? IT hmang viltu chu awm teh reng e. Phone a ri rei lo! taxi pu chuan a lo la vat a. 'Ka phone i motor-ah ka theihnghilh.’ ' Aw ka pu passenger ka dah lawka, ka thlahna che u Park Clinic -ah khan ka rawn kal ang.’ Doctor clinic ah kan awm tawh a, ka bula hnamdang pakhat SBI, Aizawl Regional office a thawk hrep tawh chuan, 'Uber taxi an nih chuan an rawn dah ang’ a ti sam et a. A sawi ang tak takin reilote-ah taxi pu chu a rawn lang ta hlawl mai a; a rawn tlan kirna man Rs 80 kan inpe a lawm takin kan inthlah ta a. Kum 2 hnua West Bengal khawpui ka'n rah leh vawi khatna a ni a, chu pawh dam mawh vang chauh a ni. He thil thlen hnu phei hi chuan tlan kual vel paha han hawi pawhin him riau a inhriatna a awm duh hle a, a man a tlawm fe zawk a, a chhung AC a ni bawk nen. Ambassador taxi eng ho chu kan chuanna motor tukverh darthlalang atang chuan an da bui hian an hriat a, lei chhuah khum an chakawm lek lek thin. Mobile apps download zuaia hemi hmanga taxi koh theih awm hma kha chuan an duh zah an in chhiar a Hmarchhak mi sum an va ei hnem dawn em! "Uber taxi a ka inziahluhna hi thla 8 vel a ni tawh a, a hma chuan ambassador ka pa khalh hlui ka khalh thin a, kum 5 ka khalh hnuin motor thar (Swift Dzire) in ka thlak a, chumi hnu lawkah chuan ka inziak lut ta a ni,” tiin taxi khalhtu pakhat chuan a sawi a. 'Kum 19 ka nih atangin ka khalh a, kum 8 ka khalh tawh; tun hma chuan a ruaka tlankual a tama, Ola ka inziah luh hnu hi chuan passenger an chhuk chiah a, call a lo kala a dang kan lam leh nghal a, ka awl hman meuh lo a ni,' tiin Ola taxi pu pakhat chuan a sawi thung. 'Chuan man hi tlawm mahse nilengin kan awl lova, kan sum chanpualah engkim a lang tlanga hei aia kalphung tha hi chu a awm lawk pawh ka ring lo,' taxi pu pakhat chuan a ti. Aizawl khawpui traffic jam tih ziaawm tum mek a ni a, mobile application hmanga kan local taxi te tlantir tumna a awm bawk a, tlemin sawi zau lawk ang aw. Awmze neia taxi tlan tirtu company lian tak leh iner tak, tunhnaia NE khawpui Guwahati pawh rawn lut tawh Uber (California, USA) leh Ola (Bangalore, India) te hian India ramah taxi Nuai 450,000 chuang an hnuaia inziaklut leh an ta khalh tir an nei a. Private taxi te pawh an ti tho thin. Smart phone ah Uber/Ola app hi download in kan awmna atanga call mai tur a ni a, phone ah chuan kan bul vela a ruaka tlan te chu a hmuh theih mai a; hei hi Global Positioning System (GPS) hman vang a ni. Central station kaltlangin taxi pu tu emaw ber chuan call chu a lo la mai a, GPS hmangin minute reilote chhungin kan awmna a lo thlenga, a phone ah chuan kan kal duhna an chhulut (confirm) a kan phone nen kan mil zeuh a, a tawk der. Min pan chhung leh kan tlan chhung zawngin kan phone hmai-ah chuan a rawn kal chin emaw, kan thlen chin a en theih reng a, driver hming, number leh motor model thlengin a lang thei a, chu mai a la ni lo a lo thlen  hun a duh rei zat tur thlengin a lang thei a ni. A rawng var an ni tlangpui bawk. Kan tum hmun kan thlenga taxi fare pawh a khalhtu  motor dash board chunga a phone hunah a rawn langa, rang takin kan phone ah sms/email in chuan man pek tur zah kan dawng nghal mai bawk. Taxi pangngai aiin chuan man a chanve tlinglo te in a tlawm zawk bawk. GPS hmang a nih avang hian mobile app hmang taxi te hi an chin an hriat zung zung theih a, a hmangtu tan a him hle tura ngaih a ni.
Share now