Tlangram loneituten lo an vat zo tawh a, vahchap pho ro (char) hun lai a ni a. Ram kang leh In kang thawm hriat tur a awm reng a, thal khawro karah hian Mizo hnamin Kut pui a neih zinga lian ber Chapchar Kut chu hman a ni. Mizo ten Kut kan neih zinga tun hnua kan hman uar ber Chapchar Kut chu March ni 4,2016 (Zirtawpni) khan Mizoram hmun hrang hrangah hman a ni a, hemi denchhen hian Mizoram sorkar chuan March ni 1-3 chhung khan a hnuaia thawkte chu Mizo thuam inbel turin ngenna a chhhuah a, he ngenna hi zawm tawk an awm rualin mipa lam erawh chuan an zawm tha tawk lo hle a ni. Zalen palaiin Aizawl khawpui chhunga sorkar Pisa a fan kualah Mizo thuama inthuam hmuh tur an tam lo hle a, sorkar hnathawk pa thenkhat a kawm kual te chuan sorkar hotute ngenna chu zahawm an tih rualin Mizo thuam in bel mai tur an neih loh avang erawh chuan hrehawm an tih thu an sawi a. Man to tak a lei ngai a nih avangin ni 3 chhung leka hak tura han lei chu an hreh deuh tlang niin an sawi. Hetihlai hian Sorkar hnathawk nuho thenkhat chuan an zawm tha ang reng a, puan bih ngai lo ten buan an bih bakah Mizo thuam thenkhat tle reuh thlengin an in bel thung a ni. Sorkar hnuaia thawk nu thenkhat chuan incheina chungchang chu mimal zalenna a nih avangin mahni duhdana inchei mai chu tha zawk ni a an hriat thu an sawiin, ‘Mizo ten a kan hak/silh mek hi Mizo thuam chu a ni vek mai a, kan hnathawhna atan a buaithlak dawn chuan kekawr hak mai pawh a Mizo lohna a awm chuang lo’ an ti bawk. Art & Culture Director R.Hmingthanzuala chuan Zalen palai zawhna chhangin Mizo hnam nun chawisana thangthar te rilrua thuk zuka hna a thawh theih nen Mizo thuama inthuam chu chin chhunzawm zel tha a tih thu a sawi a. Hetih rual hian ngenna a nih angin an department chhungah pawh inthuam kher lo an awm thu a sawi a. Mizo thuam inbel chu thangthar ten an ching chho zel chu lawmawm a tih thu Zalen palai hrilhin, Art & Culture hnuaia Mizo thuam hawh theiha an siam atang pawn kum tin nuai 10 chuang sum an lakluh thin thu a sawi bawk. CYMA President Lalbiakzuala chuan Mizo ten Kut kan neih zinga ropui ber Chapchar Kut denchhena Sorkar-in a mi chhawrte Mizo thuam in bel tura ngenna a siam chu lawmawm an tih thu Zalen palai hrilhin, ‘kan hnam thil inthuam leh thil dangte kan uar hi kan hnam ziarang chawisanna zel a ni a, thalai te pawn Mizo thuam inbel hi intihhmuh chho zel se tha ka ti’ a ti. Mizo hnam ziarang chawi larna atan hian Sorkar lam atangin Mizo thuam lamah tan la tura ngenna hi a lo chhuah fo tawh thin a, Chapchar Kut puala ngenna a siam chung changah hian sorkar hnathawk bakah Aizawl pa rawn thenkhat Zalen palaiin a kawm kual thenkhatte chuan sorkar ngenna chu tha an tih rualin thenkhat erawh chuan tul an ti lem lo thung a. Sorkar-in Mizo thuam chawi lar a duh chuan man tlawm zawka lei theih a ruahhmanna siam nise tia ngaihdan nei te pawh an awm thung bawk a ni.