Aizawl: Hun eng emaw lai kha chuan kan sakhuana avang nge nia kan serh hrim hrim vang, Pathianni ah dawr hawn kan remti lova, chumai ni lovin a firfiak zual deuh te chuan ‘Sunday closed’ tih te kan tarsak hial thin anih kha. Mahse mamawh kan nei a, ril a tam a, mamawh kan neih tho bawk si avangin dawrkai te pawhin inkhar duh mah se mipui lamin kan theih miau loh avangin dawr kan hawntir ta zawk a ni. Hetiang tho hian Pathianniah damlo tlawh emaw, mitthi ral leh chhungkaw thil pawimawh ah kan chhuak lo theilo a, chung hunah te chuan kan ril a tam a, mahse ni dang anga thingpui dawr te a inhawn thin loh avangin kan buai a. Dawr inhawng an awm emaw kawngsira thingpui dawr a lo inhawn chuan inhnawhpuar kan duhin malsawmna a chang ta hlauh a nih ber hi maw! Kawngsir eisiam dawr thintu Muana chuan, “Ni tin hnathawk kan nih avangin Pathianni hi damlo kan leh mitthi ralna hun kan neih chhun a ni a, chhuahvah nikhuaa inhnawhpuarna tur a awm thin hi kan tan chuan malsawmna a ni a. Tunah hi chuan Pathianni a thilzuar zingah hian Mizo aiin hnamdang an tam zawk niin a lang a, sum tam tak tak an hailuh avangin Mizote pawh hian ngaihven nachang hria ila ka duh hle a ni,” tiin a sawi a. Pathiannia thingpui dawr nghak hnamdang Didi-i (an koh thin dan) chuan, “A tlangpuiin kan inhralh tha thin khawp mai a, Pathianni vawi khat kan thut hian Rs. 10,000 hralh theih chang te pawh kan nei hial a. Chhuakvak an tam thin avangin dawrtu (customer) kan neih tam vanglai hi chuan kan buai thei hle,” tiin Zalen a hrilh. A bula thu hnamdang nu pakhat chuan amah chauh anih avangin Didi chu a tluklo hle tih a sawi a, Didi te anga chhungkuaa thawk chu nise tun aia tam a hralh ngei a rin thu a sawi. Kawngsir thingpui dawra inhnangfak thin tlangval pakhat chuan Pathianni serh chu tha a tih rualin mahni inbul kawngkam ah te ei tur leh nepnawi, sum lakluhna tha te ngaihtuah thei se a duh thu Zalen a hrilh bawk. “Ka lo hriat danin Khawpui sawrkarin vendor ho awmna tur siamsak a tum a, heng eisiam te hi ka dawr reng tho nangin a thianghlimna lam hi ka zawhna a ni zawk a, mumal deha an inzawrh theih nan thuneitu lam hian hma la se kei chu ka duh hle,” tiin a vei thu a sawi bawk.