Rilru lam thiam Psychiatry OPD pantu zinga a tam ber chu ruihhlo ti thin an ni a, OPD pantu zinga 80% chuan hmasawnna an hmu. Zalen palaiin State Mental Health thawktute hnen atanga thu a dawn danin Psychiatry OPD pantu zinga a zatve vel chu ruihhlo (drug leh zu) a inhnamhnawih an ni a, 25% chu depression an ni a, 20% vel chu anxiety niin a dang 5% vel chu mi bawra deuh te an ni tih an sawi. Rilru lam harsatna nei chu a kum telin an pung tual tual tih State Mental Health Officer Dr Robert L.Khawlhring chuan Zalen a hrilh a, hei hi a chhan ber chu mipui ah awareness a that tak vang te, tunhma lama mi a nia hriat thin chu natna chi khat a ni tia pawm a nih tak vang a ni ber tih a sawi. Hei bakah hian ruihhlo (drug) a hluar tak vang leh khawsak sang chho zelah stress a tam vangte nia an hriat thu a sawi a. Chu bakah chuan Mizoram district hrang hrangah Mental Health Programme te kalpui anih tak vang nia a hriat thu a sawi bawk. Dr Robert L.Khawlhring chuan Psychiatry OPD pantu zinga 80% in hmasawnna an hmu tih a sawi bawk.