Aizawl: Hnam changkang leh ropui ni tur chuan a ram chhunga chengte an hrisel a, tisa leh rilru lamah an dam a ngai a. Damna nei tur chuan damdawi thiam tam tak ramin a mamawh thin a ni. India ramah hian kum tin Doctor zir chhuak 50000 rual vel awm anga chhut ni mah se Doctor indaih lohna a na hle a. A bikin hmarchhak state-ah te damdawi thiam mamawhna hi a sang zual hle a ni. Mizoram ah pawh Doctor indaih lohna a nasat em avangin khaw thenkhat chuan Doctor pe turin sorkar an lo phut hial tawh thin a, Aizawl khawpui chhungah ngei pawh Doctor indaih lohna a nasa hle a ni tih chu mipui nawlpui ten kan hriat tlan a ni. Mizoram sorkar-in Medical College, ‘Mizoram Institute of Medical Education and Research’ nei tura ruahmanna a siam hi a hlawhtlin hun chuan Doctor indaihlohna hi nasa takin a ziaawm tur a ngaih a ni. Mizoram sorkar chuan Medical College nei tur hian nasa takin hma a la chho zel a, hetih lai hian Falkawn khuain Mizoram tana a pawimawhzia hriaa Medical College atana ram an pek State Referral Hospital-ah erawh Hospital-in a mamawh hmanrua a la awm famkim lo hle thung a ni. Referral Hospital-a thawktute chuan Medical College puitling neih theih na tur hian sorkar bakah Mizoram mipui te kan tanrual a ngaih hle a ni tiin Zalen palai an hrilh a, state thenkhatah chuan Medical College an neih theihna turin ram chhung mi hausaten theihtawp an chhuah a, hmanraw hrang hrang te an pe (donate) thin tih an sawi. Mizoram chhunga neinung zawk te pawn ram mipui mamawh kan neih theih nan ui loa an tih theih angte ti ve tura an duh thu Zalen palai hnenah hian an sawi. State Referral Hospital hi thuam that chhoh zel a ni a, tunah hian department 14 a awm tawh a, damlo pantu pawh a nei tam tial tial tawh. Hetih rual hian Medical College ni tur chuan ni khatah damlo mi 400 vel en tur an nih lai hian tunah erawh an la tlin lo viau a ni. State Referral Hospital hotute chuan mipui pan tlak a nihzia a lan theih nan Mizoram mipuite pawn tun ai nasa zawka an ngaih hluta an pan tam a tul hle niin Zalen palai an hrilh. Tunah hian thawktu mi 227 awm mekin Doctor 37, Nursing Staff 89, technical staff 39 leh office staff mi 9 vel an awm mek a. Heng mite hian Medical College neih a nih theih nan hian theih tawp an chhuah mek a ni. Referral Hospital hi a tirah chuan khum 150 awmna damdawi in a ni a, khum 250 chuang awmna turin hmalak mek a ni. Ram a changkan zel theih nan chuan a chhunga chengte an tanrual a ngai a, tanrual hi chakna a ni tia sawi fo thintute hian sorkar hmalakna kal mek hmabak la ko tak awm ah hian mahni theih tawp chhuaha tanpuina an pek ve a ngai thin a. Mite ber atanga a neinung ber thlengin Medical college kan neih theih nan hian tan rual a tul zia chu State Referral Hospital-a thawktute chuan an sawi uar hle a. Ram mipui ten damna mi pe theitu damdawi thiam kan mamawhna phuhruk tura damdawi thiam chherchhuak tu tur Zirna In neih tumna ah hian mi neinung zawkte hian an sum leh pai te Mizoram tan an thawh a ngai a ni. Falkawn khaw mipui thenkhat Zalen palaiin a kawm kualte chuan Medical College chu neih vat an duh thu sawi hlawmin, Political game atan chauh hmang lo a, Mizoram tan a ni tih hria a Sorkarna fawng cheltuten nasa taka tan an lak zel an duh thu an sawi a. Referral Hospital chu Falkawn khaw mipuiten an chhawr tangkai thu sawiin, hospital chu pan tlak leh chhumchhia zawk tan pawh innghahna tlak nia an hmuh thu an sawi hlawm. State Referral Hospital hi medical college atan a tling tâwk em tih endik a ni dawn a, sorkarin theihtawp chhuaha a lo buaipui tawh hi approve a nih loh chuan a mualphothlak hle dawn a ni.